Fótbolti

Celtic í góðum málum eftir fyrri leikinn gegn Rosenborg

Anton Ingi Leifsson skrifar
Odsonne skorar fyrsta markið í dag.
Odsonne skorar fyrsta markið í dag. vísir/getty

Celtic er í góðri stöðu eftir fyrri leikinn gegn Rosenborg í annarri umferð forkeppni Meistaradeildarinnar eftir 3-1 sigur í Skotlandi í kvöld.

Rosenborg sló út Val eftirminnilega í síðustu umferð þar sem dramatíkin var mikil en voru of litlir fyrir skosku meistarana í kvöld fyrir utan fyrstu tuttugu mínúturnar.

Rosenborg komst yfir á fimmtándu mínútu leiksins eftir laglega sókn. Nicklas Bedntner gerði þá ansi vel er hann lagði boltann á vinstri bakvörðinn Birger Meling sem kláraði færið vel.

Það leit allt út fyrir að staðan yrði þannig í leikhlé en undir lok fyrri hálfleiks jafnaði Odsonne Edouard metin er hann lék lausum hala í vítateig gestanna.

1-1 í hálfleik og heimamenn í Celtic voru ekki lengi að koma sér yfir í síðari hálfleik. Oliver Ntcham skoraði laglegt mark eftir einungis 40 sekúndur í síðari hálfleik og heimamenn komnir yfir.

Celtic gerði sig líklega til þess að bæta við fleiri mörkum en þeir skutu meðal annars í slána og André Hansen, markvörður Rosenborgar, að taka á honum stóra sínum.

Skosku meistararnir náðu inn þriðja markinu er Edouard skoraði sitt annað mark. Hann slapp einn inn fyrir vörnina, rangstöðugildra Rosenborg klikkaði og hann vippaði boltanum fyrir Hansen.

Celtic er því í ansi góðri stöðu fyrir síðari leikinn en þegar þeir sýndu klærnar í leiknum í kvöld fengu þeir nóg af færum. Eftirleikurinn ætti að verða auðveldur fyrir þá.

Mattías Vilhjálmsson var ónotaður varamaður hjá Rosenborg en þetta var fyrsti leikur liðsins eftir að liðið rak Kåre Ingebrigtsen í síðustu viku.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.