Körfubolti

Benedikt Guðmundsson líkir stuðningsmönnum Stólanna við Ragnar Reykás

Óskar Ófeigur Jónsson skrifar
Brynjar Þór Björnsson í leik með KR á móti Tindastól.
Brynjar Þór Björnsson í leik með KR á móti Tindastól. vísir/ernir

Hinn margreyndi körfuboltaþjálfari Benedikt Guðmundsson freistaðist til að skjóta aðeins á stuðningsmenn Tindastóls á Twitter þegar fréttist af skiptum Brynjars Þórs Björnssonar frá KR til Tindastóls.

Brynjar skrifaði undir samning við Tindastól í dag og kveður Vesturbæinn eftir þrettán tímabil með KR-liðinu. Enginn annar hefur spilað fleiri leiki, skorað fleiri stig eða orðið oftast Íslandsmeistari með KR en eimitt Brynjar.

Benedikt Guðmundsson er einn af mönnunum á bak við gullkynslóð KR-liðsins sem hefur nú unnið Íslandsmeistaratitilinn fimm ár í röð. Hann kom kvennaliði KR aftur í hóp þeirra bestu á nýloknu tímabili.

Benedikt líkir stuðningsmönnum Stólanna við Ragnar Reykás í umræddri færslu sinni á Twitter en mikið var gert úr óánægju Tindastólsfólksins með Brynjar Þór Björnsson í lokaúrslitunum í vor.

 KR vann þá 3-1 sigur á Tindastól og tryggði sér Íslandsmeistaratitilinn en þetta var enn eitt árið sem meistaradraumar Sólanna deyja í höndunum á KR-ingum.

Ragnar Reykás er ein þekktasta persóna Spaugstofunnar en þessi lágvaxni alþýðumaður var búinn til og leikinn af Sigurði Sigurjónssyni.

Ragnar hefur miklar skoðanir á málunum en í miðjum viðtölunum við hann þá gerist eitthvað sem verður til þess að hann skiptir snögglega og algjörlega um skoðun.

Hér fyrir neðan má sjá þessa broslegu færslu Benna á Twitter.






Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira