Enski boltinn

Harry Kane gerði nýjan sex ára samning við Tottenham

Óskar Ófeigur Jónsson skrifar
Harry Kane.
Harry Kane. Vísir/Getty

Harry Kane er ekki á förum frá Tottenham á næstunni því enski landsliðsfyrirliðinn er búinn að skrifa undir nýjan sex ára samning við enska úrvalsdeildarfélagið.

Kane hefur raðað inn mörkum fyrir félagið á síðustu tímabilum og fjölmiðlar hafa verið að orða hann við stærstu félög heims. Nú eru Tottenham menn búnir að slökkva á þeirri umræðu allri.

Harry Kane er 24 ára gamall og nýi samningurinn nær til ársins 2024 eða þangað til að hann verður þrítugur.



Kane skrifaði síðast undir nýjan samning í desember 2016 en sá átti að renna út 2022 og skila hinum hundrað þúsund pundum í vikulaun. Kane fær væntanlega góða launahækkun í nýja samningnum.

Kane skoraði 30 mörk í ensku úrvalsdeildinni í vetur en missti gullskóinn samt til Mo Salah hjá Liverpool. Hann náði því að skora 56 mörk fyrir Tottenham og enska landsliðið á almanaksárinu 2017.

Tottenham er með mjög ungt og spennandi lið sem er líklegt til afreka takist félaginu að halda kjarnanum saman. Þá er félagið að flytja á nýjan 62 þúsund manna völl og framtíðin er því björt.

Knattspyrnustjórinn Mauricio Pochettino samdi á dögunum til ársins 2023. Tottenham vinnur því markvisst af því þessa dagana að tryggja það að bestu menn liðsins spili áfram hjá félaginu.





Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.