Formúla 1

Upphitun: Þröngar götur og glamúr í vinsælustu keppni ársins

Bragi Þórðarson skrifar
Hamilton á æfingu í Mónakó
Hamilton á æfingu í Mónakó vísir/getty

Vinsælasti akstursíþróttaviðburður heims ár hvert fer fram á sunnudag þegar að sjötta umferðin í Formúlu 1 fer fram í Mónakó. Eftirvæntingin er mikil og ekki skemmir fyrir að slagurinn um heimsmeistaratitilinn hefur verið gríðarlegur það sem af er ári.

Bretinn Lewis Hamilton á Mercedes hefur yfirhöndina gegn Þjóðverjanum Sebastian Vettel á Ferrari eins og er. Lewis hefur 17 stiga forskot á Vettel fyrir kappaksturinn en 25 stig fást fyrir fyrsta sætið. Báðir þessir ökumenn eru að eltast við sinn fimmta heimsmeistaratitli í ár, og báðir hafa sigrað tvisvar í Mónakó á ferlinum.

Keppt hefur verið á götum Mónakó síðan árið 1929. Brautin er mjög þröng sem gerir framúrakstur mjög erfiðan, sérstaklega á þessum breiðu bílum sem keppt er á í dag. Því geta tímatökurnar á laugardaginn skorið úr um kappaksturinn. Glamúrinn og fegurðin í Mónakó á sér enga hliðstæðu og því ekki að ástæðulausu að margir ökuþóranna kjósa að búa í borginni. Það má því með sanni seigja að Formúlan er á vissan hátt að koma heim þegar að bílarnir verða ræstir af stað klukkan 13:10 á sunnudaginn.



Brautin í Mónakó er í stórglæsilegu umhverfi vísir/getty

Lewis Hamilton og Mercedes hafa unnið síðustu tvær keppnir og lítur út fyrir að uppfærslurnar sem liðið kom með í spænska kappaksturinn hafi skilað sér. Toto Wolff, stjóri liðsins, sagði þó í vikunni að Mercedes-bíllinn verði ekki sá hraðasti á götum Mónakó og það kom á daginn á fyrstu æfingum helgarinnar.

Þar var það Red Bull sem átti lang hraðasta bílinn, en liðið hefur oft gert það gott á götum Mónakó. Lágur meðalhraði brautarinnar hentar Red Bull bílunum vel en bæði Ferrari og Mercedes voru í vandræðum á æfingum.

Bæði Ferrari og Red Bull þurfa á góðum úrslitum að halda ef liðin ætla ekki að missa Mercedes allt of langt frá sér í baráttunni um titil bílasmiða. Því má búast við mikilli baráttu í þessum heimsfræga kappakstri sem verður í beinni útsendingu á Stöð 2 Sport um helgina. Útsending frá tímatökunni hefst klukkan 12:50 á morgun, laugardag.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.