Innlent

Nýkjörin sveitarstjórn opin fyrir að skoða aðra leið en um Teigsskóg

Kristján Már Unnarsson skrifar
Ekið niður Ódrjúgsháls í Gufudalssveit. Vegagerðin vill í staðinn að Vestfjarðavegur liggi um Teigsskóg.
Ekið niður Ódrjúgsháls í Gufudalssveit. Vegagerðin vill í staðinn að Vestfjarðavegur liggi um Teigsskóg. Stöð 2/Egill Aðalsteinsson.

Nýkjörin sveitarstjórn Reykhólahrepps er öll opin fyrir því að endurskoða ákvörðun um veglínu um Teigsskóg, komi fram raunhæfari lausn í úttekt norskrar verkfræðistofu. Þetta kom fram í fréttum Stöðvar 2. 

Þetta er orðið fimmtán ára deilumál; hvar Vestfjarðavegur eigi að liggja í gegnum Gufudalssveit í framtíðinni. Þegar fráfarandi sveitarstjórn í byrjun marsmánaðar valdi á milli tveggja valkosta, að vegurinn færi í gegnum Teigsskóg eða í jarðgöngum undir Hjallaháls, samþykkti hún með fjórum atkvæðum gegn einu að setja Teigsskógarleiðina inn á aðalskipulag.

Frá fundi hreppsnefndar Reykhólahrepps þann 8. mars sem samþykkti að setja veglínu um Teigsskóg inn á aðalskipulag. Stöð 2/Sindri Reyr Einarsson.

Mánuði síðar tók hreppsnefndin hins vegar óvænt hliðarskref, þegar hún samþykkti að fela norskri verkfræðistofu að gera nýja úttekt á veglínum. Hagkaupsbræðurnir Sigurður Gísli og Jón Pálmasynir veita Reykhólahreppi fimm milljóna króna styrk til að kosta úttektina, að sögn Ingibjargar Birnu Erlingsdóttur sveitarstjóra. 

Viðmælendum okkar í Reykhólahreppi ber saman um að Teigsskógarmálið hafi nær ekkert verið rætt fyrir þessar kosningar en þar var persónukjör. En hvaða afstöðu hafa nýkjörnir hreppsnefndarmenn til málsins? Við spurðum alla fimm í dag: 

Ingimar Ingimarsson sagði: 

Búið að afgreiða málið, ættum að halda okkur við það. Ef annar skýr valkostur kæmi fram, sem öllum litist á, mætti taka upp skipulagið. 

Árný Huld Haraldsdóttir sagði: 

Ég er alveg tilbúin að skoða að taka upp skipulagið, ef niðurstaða Norðmannanna verður þannig að þetta sé eitthvað skrítið. Við getum samt ekki beðið endalaust eftir því að eitthvað verði gert. 

Jóhanna Ösp Einarsdóttir sagði: 

Ef það kemur eitthvað út úr norsku úttektinni sem okkur hefur yfirsést er ég tilbúin að taka upp aðalskipulagið. 

Karl Kristjánsson sagði: 

Stend við fyrri afstöðu um að friðlýsa Teigsskóg og vil jarðgöng undir Hjallaháls. 

Embla Dögg Jóhannsdóttir sagði: 

Mér líst vel á leiðina í gegnum Teigsskóg og tel líklegast að hún verði farin. Þetta þarf að fara að leysa, þetta er orðið of langdregið. Er samt alveg tilbúin að taka upp skipulagið og er opin fyrir öllu. 

Með öðrum orðum: Allir eru tilbúnir að opna málið.

Styrmir Sæmundsson og Jóhanna Ösp Einarsdóttir í Fremri-Gufudal. Stöð 2/Egill Aðalsteinsson.

Það gætir þó óþreyju, eins og fram kom í máli Jóhönnu Aspar á Stöð 2 í fyrra, en hún vill láglendisveg. 

„Ég vil bara að þeir byrji. Mér er svona nokkuð sama hvar þeir fara, - bara að þeir byrji,“ sagði Jóhanna. 

Hér má sjá frétt Stöðvar 2:


Tengdar fréttir

Teigsskógur varð fyrir valinu

Hreppsnefnd Reykhólahrepps ákvað á fundi sem lauk nú fyrir skömmu að setja veglínu um Teigsskóg inn á aðalskipulag sveitarfélagsins.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.