Innlent

Ráðherra lætur kanna áhrif af hvalveiðum

Birgir Olgeirsson skrifar
Kristján Þór Júlíusson með undirskriftirnar í sjávarútvegsráðuneytinu í dag.
Kristján Þór Júlíusson með undirskriftirnar í sjávarútvegsráðuneytinu í dag. Vísir/Vilhelm
Kristján Þór Júlíusson, sjávarútvegs- og landbúnaðarráðherra, hefur falið Hagfræðistofnun og Hafrannsóknarstofnun að kanna áhrif af hvalveiðum og mun byggja ákvörðun sína um áframhaldandi hvalveiðar á þeirri niðurstöðu.

Verður meðal annars kannað hvað áhrif hvalir hafa á lífríki og hvað áhrif hvalveiðar hafa á stofninn og aðrar atvinnugreinar.

Þetta sagði Kristján Þór eftir að Sigursteinn Másson, fulltrúi alþjóða dýravelferðarsjóðsins, afhenti ráðherra rúmlega 50 þúsund undirskriftir þar sem skorað er á stjórnvöld að gera allan Faxaflóa að griðasvæði hvala.

Söfnun undirskriftanna hefur farið fram undanfarið ár en Sigursteinn Másson sagði í ráðuneytinu í dag að allir flokkar í Reykjavíkurborg væru sama sinnis og einnig Samtök ferðaþjónustunnar.

Fulltrúar frá IFAW (International Fund for Animal Welfare), Hvalaskoðunarsamtökum Íslands og Samtökum ferðaþjónustunnar afhentu ráðherra undirskriftirnar.Vísir/Vilhelm
Þegar Kristján tók við undirskriftunum greindi hann frá því að hann hefði lagt fyrir ríkisstjórn í morgun minnisblað um það með hvaða hætti hann hyggst standa að ákvörðun um það hvernig haldið verður á spurningunni um framhald hvalveiða. 

Hann hefur kallað eftir úttekt Hafrannsóknastofnunar á áhrifum hvalastofna á lífríki í sjónum og sömuleiðis óskað eftir því við Hagfræðastofnun Háskóla Íslands að gera úttekt á þjóðhagslegum áhrifum hvalveiða. 

Kristján sagðist vænta þess að þessar úttektir liggi fyrir með haustinu.

Sagðist hann ætla að kalla í þá aðila sem stóðu að þessari undirskriftasöfnun þegar þessi niðurstaða liggur fyrir ásamt öðrum hagsmunaaðilum. 

„Mín skoðun er sú að við þessi 350 þúsund manns sem hér búum eigum að geta náð saman um ólíklegustu mál og þar á meðal með hvaða hætti við ætlum að nýta auðlindir okkar með sem bestum og skynsamlegustum hætti. Það á ekki að þurfa að skipta þjóðinni í margar fylkingar vegna þess. Þetta er mín sannfæring.“




Fleiri fréttir

Sjá meira


×