Fjórar líkamsárásir voru framdar á höfuðborgarsvæðinu í nótt. Þar af voru tvær sem áttu sér stað í miðborg Reykjavíkur og í öðru tilfellinu þurfti að fylgja brotaþola á slysadeild til aðhlynningar.

Alls komu sjötíu verkefni á borð lögreglunnar á höfuðborgarsvæðinu í nótt og sex ökummenn voru stöðvaðir eftir að hafa ekið undir áhrifum áfengis eða fíkniefna.

Þá stöðvaði lögreglan ökumann á Reykjanesbraut við Kópavog um klukkan ellefu í gærkvöldi eftir að hraði bifreiðar hans hafði mælst 136 kílómetrar á klukkustund þar sem hámarkshraði var aðeins leyfður 80 kílómetrar á klukkustund. Ökumaðurinn reyndist einnig vera undir áhrifum áfengis og fíkniefna sem og vera sviptur ökuréttindum.

Farþegi þurfti á sálrænni aðstoð að halda eftir háttalag ökumanns

Klukkan þrjú í nótt reyndi ökumaður bifreiðar að komast undan lögreglu eftir að hafa ekið gegn rauðu ljósi á Suðurlandsbraut. Lögregla hóf eftirför en ökumaðurinn sinnti ekki stöðvunarmerkjum hennar. Eftirförin var stutt og snörp en ökumaðurinn stöðvaði bifreiðina að sjálfsdáðum í nærliggjandi verslunarhverfi.

Ökumaðurinn reyndist vera allsgáður en að sögn lögreglu verður hann kærður fyrir nokkur brot og þar á meðal að setja líf manneskju í óljósan háska. Farþegi í bílnum þurfti meðal annars á sálrænni aðstoð að halda frá lögreglu vegna háttalags bílstjórans.

Í spyrnukeppni á Reykjanesbraut

Lögreglan hafði afskipti af tveimur bifreiðum á Reykjanesbraut við Kópavog um klukkan tvö í nótt en hraði bifreiða þeirra mældist 148 kílómetrar á klukkustund. Grunur leikur á að ökumennirnir hafi verið í spyrnukeppni. Þeir játuðu báðir sök og munu því eiga von á 230 þúsund króna sekt hvor um sig auk þess að vera sviptir ökuréttindum sínum í tvo mánuði.