Innlent

Vel mannað í Grunnskóla Fjallabyggðar

Höskuldur Kári Schram skrifar

Skólastjóri Grunnskóla Fjallabyggðar segir að vel hafi gengið að ráða kennaramenntaða starfsmenn á undanförnum árum. Núna er einn leiðbeinandi starfandi hjá skólanum en áður fyrr voru þeir mun fleiri.

Grunnskóli Fjallabyggðar varð til með sameiningu grunnskóla Ólafsfjarðar og Siglufjarðar árið 2010 en þar eru nú rúmlega tvö hundruð nemendur.

„Við vorum náttúrulega á Siglufirði og hér á Ólafsfirði með tvær skólabyggingar samkvæmt gamla laginu, barna- og gagnfræðiskóli. En eftir að við stofnuðum Grunnskóla Fjallabyggðar þá erum við með eina bygginu á Ólafsfirði og aðra á Siglufirði. Þetta gengur vel en það var heilmikið mál að venjasts því að koma á skólaakstri og fyrir alla að sætta sig við nýtt fyrirkomulag,“ segir Jónína Magnúsdóttir skólastjóri.

Hún segir að nemendur hafi almennt tekið vel í þessar breytingar og betur gangi að ráða kennaramenntaða starfsmenn. Núna er einn leiðbeinandi hjá skólanum en áður fyrr voru þeir mun fleiri.

„Það gengur miklu betur að ráða kennara og í raun og veru hefur starfsmannahópurinn verið mjög stöðugur. Frá því Grunnskóli Fjallabyggðar var stofnaður árið 2010 þá höfum við ekki verið í vandamálum. Ég auglýsi og við fáum umsóknir.“

Hún segist þó ekki kunna eina skýringu á þessari breytingu.

„Svo hefur líka svæðið upp á svo margt að bjóða. Hér búum við í næsta nágrenni við fjallið ef við höfum áhuga á náttúrunni og fjörunni. Það eru stuttar vegalengdir og býsna gott samfélag að búa í. Ég er sjálf fæddd og uppalin upp á höfuðborgarsvæðinu og hef notið þess í langan tíma að búa hér úti á landi.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.