Leigjendur látnir gjalda fyrir slæma stöðu á markaði

Lögfræðingur hjá Neytendasamtökunum segir allt of algengt að leigusalar nýti sér erfiða stöðu leigjenda á markaði til að hækka verð og rukka þá um ýmis aukagjöld. Um 2.500 leigjendur leituðu til samtakanna á síðasta ári og hafa aldrei verið fleiri.

Félagsmálaráðherra hefur ákveðið að boða fulltrúa stærstu leigufyrirtækja landsins til fundar á næstu vikum til að ræða stöðuna á leigumarkaði. Þetta kom fram í máli ráðherra á Alþingi í gær en hann telur nauðsynlegt að endurskoða þær reglur sem nú eru í gildi.

„Það berast fregnir víða af landinu um það að leigufélög, einkarekin leigufélög í eigu stórra lífeyrissjóða m.a., gangi ansi hart fram gagnvart fólki sem er á leigumarkaði. Þetta er verkefni sem þarf að skoða og þarf að setja í gang einhverja vinnu,“ sagði Ásmundur Einar Daðason á Alþingi í gær.

Neytendasamtökin hafa um árabil boðið upp á sérstaka leigjendaaðstoð en um tvö þúsund og fimm hundruð fyrirspurnir bárust í fyrra og hafa aldrei verið fleiri.

Einar Bjarni Einarsson lögfræðingur hjá Neytendasamtökunum segir að leigjendur séu oft í veikri stöðu þar sem eftirspurn eftir húsnæði sé mun meiri en framboð. Dæmi eru um að leigusalar nýti sér þetta með því rukka leigjendur um ýmis aukagjöld.

„Það kemur fyrir að það komi reikningar á borð varðandi einhver milligöngugjöld og útgöngugjöld og jafnvel innflutningsgjöld sem eru þá hvergi nefnd í leigusamningi né í leigusamningi stóru leigufélaganna. Leigjendur sjá sér oft ekki annað fært en að greiða þessa reikninga,“ segir Einar Bjarni. 

Hann segir að skammtímasamningar séu líka notaðir til að knýja fram hækkun á húsaleigu.

"Samningar eru í auknum mæli gerðir tímabundnir til eins árs í senn, jafnvel skemur. Við endurnýjun og þá oft stuttu áður en samningur rennur út þá er borinn fram nýr samningur með kannski tíu eða tuttugu prósenta hækkun. Leigjandi sem þekkir ekki stöðu sína nægilega vel er þá nauðbeygður til að skrifa undir samninginn eða að öðrum kosti lenda á götunni,“ segir Einar Bjarni.