Dæmi um að afgreiðsla skipulags hafi dregist í næstum þrjú ár

Sérfræðingur hjá Samtökum iðnaðarins segir tafir og hæga afgreiðslu hins opinbera aftra uppbyggingu íbúðarhúsnæðis. Dæmi eru um að einföld deiliskipulagsbreyting í Reykjavík hafi dregist í á þriðja ár. Hagfræðingur segir að byggja þurfi 45 þúsund íbúðir fyrir árið 2040, en arkitekt varar við skyndilausnum.

Samtökin héldu fjölmennan fund um íbúðarhúsnæði í morgun, þar sem farið var yfir núverandi stöðu og framtíðarhorfur á markaði. Í nýrri íbúðatalningu samtakanna kemur fram að talsvert meiri kraftur er nú í uppbyggingu húsnæðis en áður. Langmest er uppbyggingin í Reykjavík, en hlutfallslega er hún hins vegar mest í Mosfellsbæ. Betur má þó, ef duga skal – að mati Ingólfs Benders, hagfræðings SI.

„Í takt við vaxandi íbúafjölda, vöxt deilihagkerfisins o.s.frv. á síðustu árum þá vantar okkur u.þ.b. 45 þúsund nýjar íbúðir inn á þennan markað í landinu öllu fram til 2040,“ segir Ingólfur.

Hann bendir á að þó uppbygging hafi nú aukist hafi framkvæmdir verið látnar bíða alltof lengi.

„Í fyrra t.a.m., þegar fólki í landinu fjölgaði um tíu þúsund þá voru ekki byggðar nema 1.700 íbúðir. Þá voru tæplega sex nýir íbúar að bítast um hverja nýja íbúð,“ bendir Ingólfur á.

Skriffinskan hamli uppbyggingu

Óþörf skriffinska, skortur á rafrænni stjórnsýslu og of dreifð ábyrgð á málaflokknum sætti gagnrýni á fundinum. Þannig nefndi sérfræðingur dæmi um deiliskipulagsbreytingu í Úlfarsárdal, þar sem byggja átti parhús en til stóð að gera þess í stað ráð fyrir stærra fjölbýlishúsi – til að mæta aukinni eftirspurn.

„Það tók tvö ár, bara frá því að tillagan kemur fram þar til samþykkt er að auglýsa breytingu á deiliskipulaginu. Það voru tvö ár, svo líða þrjú ár í heildina þar til útboðsskilmálar vegna byggingarréttar á lóðunum voru auglýstir. Og þá er ekki enn farið að byggja, þegar komin eru þrjú ár,“ segir Eyrún Arnarsdóttir, viðskiptastjóri á mannvirkjasviði SI.

Arkitektinn Pétur Ármannson varar við því að hverfa til skyndilausna á borð við einingahús. Hann segir rétt að líta til þeirra hverfa sem byggð hafi verið við sambærilegar aðstæður í gegnum tíðina og læra af reynslunni – frekar en að kasta til höndum.

„Nú er verið að leita að einhverjum töfralausnum frá útlöndum, einhverjum svona „fiffum“, en ég held að miklu betra og vænlegra til árangurs sé að læra af því hvernig við höfum verið að takast á við þetta. Við erum með 100 ára sögu af því að leita erfið húsnæðismál í þéttbýli á Íslandi,“ segir Pétur.