Jón Guðmundsson mun taka við af Sverri Þór Sverrissyni sem þjálfari kvennaliðs Keflavíkur í körfubolta. Þetta tilkynnti félagið í kvöld.

Sverrir Þór hefur verið þjálfari kvennaliðs Keflavíkur síðustu ár en Keflavík greindi frá því fyrr í mánuðinum að hann og Jón myndu taka við karlaliði Keflavíkur af Friðriki Inga Rúnarssyni.

Í kvöld sendi félagið svo frá sér tilkynningu þar sem segir að Jón verði þjálfari meistaraflokks kvenna.

Jón hefur verið öflugur þjálfari yngri flokka um árabil ásamt því að vera í hópi bestu körfuboltadómara landsins.

Keflavík var ríkjandi Íslands- og bikarmeistari fyrir þetta tímabil. Keflavík varði bikartitilinn en datt út í undanúrslitum Domino's deildar kvenna þar sem Valur hafði betur 3-1.