Jói Berg lagði upp og hafði betur gegn Gylfa

Íslensku landsliðsmennirnir Jóhann Berg Guðmundsson og Gylfi Þór Sigurðsson voru í byrjunarliðinu hjá sínum liðum þegar Burnley fékk Everton í heimsókn í fyrsta leik dagsins í enska boltanum.

Everton komst yfir í fyrri hálfleik þegar Cenk Tosun opnaði markareikning sinn í ensku úrvalsdeildinni með því að skalla boltann í netið eftir fyrirgjöf Theo Walcott sem Seamus Coleman flikkaði áfram og beint á kollinn á Tosun.

Heimamenn náðu hins vegar að koma til baka í síðari hálfleiknum. Á 56.mínútu skoraði Ashley Barnes og á 80.mínútu var svo komið að Chris Wood en hann skallaði þá hornspyrnu Jóhanns Berg í netið.

Skömmu síðar var Gylfa Þór skipt af velli og nokkrum mínútum síðar eða á 86.mínútu var fyrirliða Everton, Ashley Williams, vikið af velli fyrir algjöra fífldirfsku. Ekki í fyrsta skiptið sem kappinn gerir sig sekan um slíkt en tilburðir hans í baráttu við Barnes minntu frekar á tilþrif í blönduðum bardagalistum en knattspyrnu.

Tíu á móti ellefu tókst Everton ekki að jafna metin á lokamínútunum og 2-1 sigur Burnley staðreynd. Burnley styrkti þar með stöðu sína í 7.sæti deildarinnar þar sem liðið hefur 40 stig. Everton með sex stigum minna í 9.sæti.