Innlent

Sjálfstæðisflokkurinn vill þrjú ný hverfi í Reykjavík

Þórdís Valsdóttir skrifar
Í Reykjavíkursáttmála Sjálfstæðisflokksins í Reykjavík segir að ný hverfi munu rísa við Keldur og í Örfirisey og að hafin verði vinna við skipulagningu byggðar í Geldinganesi.
Í Reykjavíkursáttmála Sjálfstæðisflokksins í Reykjavík segir að ný hverfi munu rísa við Keldur og í Örfirisey og að hafin verði vinna við skipulagningu byggðar í Geldinganesi. Vísir/Anton Brink

Sjálfstæðisflokkurinn í Reykjavík vill einfalda stjórnkerfi borgarinnar, fækka borgarfulltrúum, byggja upp ný hverfi í borginni og boðar til stórátaks í samgöngumálum. Þetta, ásamt öðru, kemur fram í Reykjavíkursáttmála flokksins sem samþykktur var í gær.

Á annað hundrað manns sóttu svokallaðan Reykjavíkurfund í gær en á fundinum var sáttmálinn samþykktur. Vörður fulltrúaráð Sjálfstæðisfélaganna í Reykjavík stóð fyrir fundinum og í sáttmálanum eru markaðar áherslur flokksins fyrir komandi borgarstjórnarkosningar.

Í Reykjavíkursáttmálanum segir að flokkurinn hyggist fækka borgarfulltrúum úr 23 í 15, komist þeir til valda í Reykjavík í vor. Samkvæmt sveitarstjórnarlögum skal fjöldi fulltrúa í sveitarfélögum, þar sem íbúar eru hundrað þúsund eða fleiri, vera 23 til 31. Þá segir að flokkurinn ætli sér að einfalda stjórnkerfið og stytta boðleiðir til þess að bæta þjónustu við íbúa.

„Við viljum beina því til Alþingis að Reykjavík fái að fækka borgarfulltrúum aftur og gera það svo í framhaldinu. Þetta er gríðarlegur kostnaður, mörg hundruð milljónir sem fara í þetta og við teljum að einfaldara stjórnkerfi sé betra stjórnkerfi,“ segir Eyþór Arnalds, oddviti Sjálfstæðisflokksins í Reykjavík.


Ætla sér að efla Strætó

Sjálfstæðisflokkurinn vill efla Strætó og gera hann þjónustuvænni svo almenningssamgöngur verði raunhæfur kostur fyrir fleiri. Þá verður kannað hvort möguleiki sé á því að samgöngumiðstöð rísi við Kringluna en fyrir liggur að endurskipulagning fari fram við Kringluna.

„Miðstöð er eins og orðið segir miðja og það má segja að BSÍ sé ansi vestarlega en Kringlan er hjartað í borginni því það er stutt í allar áttir. Lækjargatan var miðjan einu sinni, svo Hlemmur og það er rökrétt að fara austar. Við Kringluna eru miklar umferðaræðar og mikil þjónusta. Við sjáum fyrir okkur að sterk miðstöð fyrir Strætó er best þar sem þjónustan er,“ segir Eyþór.

Eyþór segir að víða í Reykjavík séu þung og hættuleg víða í Reykjavík. „Það var gerður samningur um framkvæmdastopp árið 2012 og við viljum einfaldlega fara í stórátak og vinna með Vegagerðinni og klára þetta átak á næstu fjórum árum. Það er mikilvægt að það sé farið í þetta, tafatíminn er orðinn svo mikill,“ segir Eyþór og bætir við að flokkurinn vilji vinna nútímalegar lausnir en ekki mannvirki sem rísa of hátt.


Vilja sá þrjú ný hverfi rísa

Í Reykjavíkursáttmálanum er fjallað um að Reykjavík skuli vera besti búsetukosturinn og að aðalskipulag verði tekið upp í upphafi nýs kjörtímabils. Þá segir að við Keldur muni rísa fjölskylduvænt hverfi, að ný byggð muni rísa í Örfirisey og að hafin verði vinna við skipulagningu byggðar í Geldinganesi.

„Í dag er ekki ein einasta íbúð fyrirhuguð í Örfirisey eða á Granda. Ég held að þetta sé spennandi kostur fyrir fólk sem vill búa í Vesturbænum eða Miðbænum og það er hægt að fara í uppbyggingu þarna fljótlega, þú ert ekki að raska grónu hverfi og það er það sama við Keldur. Það er mjög dýrt að byggja til dæmis í Lækjargötunni eða Tryggvagötunni þar sem þarf að rífa hús til að byggja önnur,“ segir Eyþór og bætir við að þetta sé leið til að þétta byggð í Reykjavík á hagkvæman hátt.


Tengdar fréttir

Sjálfstæðismenn bæta verulega við sig

Samfylkingin tapar næstum fimm prósentustigum frá kosningunum 2014 í nýrri könnun Fréttablaðsins og frettabladid.is, en Sjálfstæðisflokkurinn bætir við sig 10 prósentum frá 2014. Framboðslisti Viðreisnar í borginni verður kynntur innan

Hildur endurheimti framtíðina eftir krabbamein og fór í pólitík

Hildur Björnsdóttir sem skipar annað sæti á lista Sjálfstæðisflokksins í Reykjavík segir frá því að eftir að hafa barist við krabbamein og endurheimt heilsu sína hafi hún ákveðið að grípa tækifærið og fara í pólitík. Hún er hlynnt borgarlínu, vill lengja leikskólaaldurinn og segir að það þurfi að finna sátt um staðsetningu flugvallarins.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.