Lífið

Kanna hvort álag hafi valdið því að atkvæði komust ekki til skila í einvíginu

Birgir Olgeirsson skrifar
Dagur Sigurðsson og Ari Ólafsson áttust við í einvígi Söngvakeppni Sjónvarpsins í gærkvöldi.
Dagur Sigurðsson og Ari Ólafsson áttust við í einvígi Söngvakeppni Sjónvarpsins í gærkvöldi. RÚV
Ríkisútvarpið skoðar nú ásamt Vodafone hvort of mikið álag á símkerfi hafi orsakað það að símaatkvæði komust ekki til skila í einvígi úrslita Söngvakeppni Sjónvarpsins sem fór fram í Laugardalshöll í gærkvöldi. Höfundur lagsins Í stormi, sem var í einvíginu, segist hafa fengið fjölda skilaboða þess efnis og nefnir sem dæmi að tengdamóðir hans reyndi að kjósa lagið 42 sinnum í einvíginu, en tólf þeirra náðu ekki í gegn.

Í einvíginu mættust Dagur Sigurðsson með lagið Í stormi og Ari Ólafsson með lagið Our Choice. Ari stóð uppi sem sigurvegari í hreinni símakosningu áhorfenda.

Lögin tvö sem komust í einvígið voru þau sem höfðu fengið flest atkvæði frá sjö manna dómnefnd Söngvakeppninnar og áhorfendum sem kusu í gegnum síma.

Dagur fékk 20.183 stig frá dómurum keppninnar, sem voru sjö talsins, og Ari 17.453 atkvæði. Frá áhorfendum fékk Dagur 24.547 atkvæði í fyrri umferðinni en Ari 18.408 atkvæði. RÚV hefur enn ekki gefið upp hvernig atkvæðin skiptust á milli Ara og Dags í einvíginu.

Júlí Heiðar Halldórsson, höfundur lagsins Í stormi.RÚV
„Ótrúlega leiðinlegt mál“

Júlí Heiðar Halldórsson, höfundur lagsins Í stormi, segist hafa fengið fjöldann allan af ábendingum þess efnis að fólk hafi ekki náð í gegn þegar það reyndi að kjósa Dag Sigurðsson í einvíginu.

„Þetta er ótrúlega leiðinlegt mál. En það er verið að skoða þetta og svo kemur í ljós hvað kemur út úr því,“ segir Júlí Heiðar.

Hann segist afar stoltur af árangrinum og Dagur hafi staðið sig ótrúlega vel. Hann hrósar einnig Ara Ólafssyni, segir hann hafa verið glæsilegan í þessari keppni, staðið sig ótrúlega vel og með flott lag.

„En það er svekkjandi að tapa til að byrja með. Svo sættir maður sig við það og nýtur þess að vera í örðu sæti,“ segir Júlí Heiðar og nefnir að margir frábærir listamenn hafi hafnað í öðru sæti með glæsileg lög, þar á meðal Daði Freyr í fyrra og Friðrik Dór árið 2015.

Segir þrettán stúlkur á fótbotamóti ekki hafa náð í gegn

Því segir hann það hafa verið leiðinlegt að vakna við fjölda skilaboða þess efnis að fólk hafi ekki náð í gegn þegar það reyndi að kjósa Dag í einvíginu. Fólk hefur sent honum skjáskot þess efnis og þá hafa aðrir haft samband við hann.

Til að mynda ein kona sem var með þrettán stúlkur á fótboltamóti. Stúlkurnar reyndu allar að kjósa Dag en atkvæði þeirra virtust ekki ná í gegn.

„Það kom bara eins og það væri ekkert atkvæði móttekið, eins og símtalinu hefði verið hafnað,“ segir Júlí.

„Pabbi minn komst ekki í gegn með atkvæði, systir mín komst ekki í gegn, afi minn komst ekki í gegn, maður frænku minnar komst ekki í gegn og tengdamóðir mín hringdi 42 sinnum inn en tólf af þeim náðu ekki í gegn,“ segir Júlí.

Júlí segir Dag hafa staðið sig eins og hetju í keppninni.RÚV
Skiljanlegt að álagið sé svakalegt

Hann segir að í forkeppninni í Danmörku sé símakosningunni háttað þannig að þrjú númer eru fyrir hvort atriði í svona úrslitum. Í Söngvakeppni Sjónvarpsins er hins vegar aðeins eitt númer á hvort lag.

„Og þá er skiljanlegt að álagið verði svakalegt, sérstaklega kannski á númerið sem er að fá fleiri atkvæði til að byrja með, þá getur komið upp sú staða að það frjósi eitthvað,“ segir Júlí.

Hann segir hópinn sem stóð að laginu ákaflega stoltan með frábæran árangur. Dagur hafi komið, séð og sigrað sem söngvari.

Segir RÚV vilja hafa allt á hreinu

„En þetta er leiðinlegt mál og fær mann til að hugsa hvað átti sér stað í gær,“ segir Júlí og á honum að heyra að þetta varpi skugga á annars afar ánægjulega keppni.

Hann segir RÚV hins vegar vera að kanna málið ásamt Vodafone. „Það eru allir farnir í málið. RÚV er ekki að fara að fela neitt. Þau eru öll á því að hlutirnir þurfi að vera eins og þeir eiga að vera,“ segir Júlí Heiðar og bætir við að lokum:

„Við viljum lika bara að þetta komi ekki fyrir aftur og að keppendur á næsta ári þurfi ekki að hafa áhyggjur af svona löguðu.“​


Tengdar fréttir

Flaug út úr líkamanum og horfði á sjálfan sig syngja

Ari Ólafsson mun keppa fyrir Íslands hönd í Söngvakeppni evrópskra sjónvarpsstöðva í maí næstkomandi með lag sitt Our Choice. Ari segir sigurinn hafa komið sér gríðarlega á óvart og að tilfinningarnar hafi nær borið hann ofurliði í gærkvöldi.






Fleiri fréttir

Sjá meira


×