Þetta eru stelpurnar sem byrja á móti Evrópumeisturunum í dag

Freyr Alexandersson, þjálfari íslenska kvennalandsliðsins í fótbolta, hefur valið byrjunarliðið sitt á móti Evrópumeisturum Hollands á Algarve mótinu.

Fanndís Friðriksdóttir kemur inn í liðið og spilar sinn fyrsta leik á mótinu en hún missti af leikjunum við Danmörku og Japan vegna meiðsla.

Ingibjörg Sigurðardóttir byrjar í dag og hefur þar með, ein leikmenna liðsins, verið í byrjunarliðinu í öllum þremur leikjunum.

Þrír leikmenn halda sæti sínu í byrjunarliðinu frá því í Japansleiknum en það eru auk Ingibjargar þær Guðbjörg Gunnarsdóttir markvörður og Selma Sól Magnúsdóttir.

Hollenska liðið vann Evrópumeistaratitilinn á heimavelli síðasta sumar og hefur skorað 9 mörk í tveimur fyrstu leikjum sínum á Algarve mótinu.

Leikurinn hefst klukkan 15:40 að íslenskum tíma og fer fram á Est. Municipal de Albufeira. Þetta er þriðji, og síðasti, leikur Íslands í riðlakeppninni en leikið er um sæti á miðvikudaginn. Til þessa hafa stelpurnar gert markalaust jafntefli gegn Danmörku og tapað 1-2 gegn Japan.

Byrjunarlið Íslands í dag gegn Hollandi á Algarve:

Guðbjörg Gunnarsdóttir (Markvörður)

Sif Atladóttir

Glódís Perla Viggósdóttir

Gunnhildur Yrsa Jónsdóttir

Ingibjörg Sigurðardóttir

Sara Björk Gunnarsdóttir (Fyrirliði)

Hallbera Guðný Gísladóttir

Selma Sól Magnúsdóttir

Agla María Albertsdóttir

Rakel Hönnudóttir

Fanndís Friðriksdóttir