Leikmenn sem deila við Mourinho verða seldir

Leikmönnum Manchester United er hollara að halda sambandi sínu við knattspyrnustjórann Jose Mourinho góðu vilji þeir ekki eiga það á hættu að verða seldir frá félaginu.

Mourinho vill að hlutirnir séu gerðir eftir sínu höfði og hefur komist á síður dagblaðanna í ófá skipti vegna meintra deilna við leikmenn sína. Samkvæmt heimildum enska blaðsins Independent hafa forráðamenn United gefið það út að ef Mourinho lendir í óviðráðanlegum deilum við leikmenn þá verði þeir seldir frá félaginu.

Portúgalinn er samningsbundinn til 2020 og hefur fullt traust Ed Woodward og félaga í stjórn United í öllum aðgerðum sínum.

Ósætti á að ríkja milli Mourinho og Frakkans Paul Pogba eftir að hann var settur á bekkinn í nokkrum leikjum í byrjun árs og bæði Pogba og umboðsmenn hans fengu að heyra það að félagið myndi styðja Mourinho í einu og öllu.

Manchester United er í harðri baráttu um annað sætið í ensku úrvalsdeildinni og mætir erkifjendunum og helstu keppinautunum í Liverpool í stórleik 30. umferðar í hádeginu á morgun, laugardag.