Innlent

Farþegar hafa setið fastir í flugvél í þrjá tíma

Kjartan Kjartansson skrifar
Farþegarnir í vél Wizz air frá Riga hafa beðið í á fjórðu klukkustund eftir að komast frá borði.
Farþegarnir í vél Wizz air frá Riga hafa beðið í á fjórðu klukkustund eftir að komast frá borði. Friðrik Ingi Friðriksson
Veður kemur enn í veg fyrir að hægt sé að nota landgöngubrýr á Keflavíkurflugvelli. Farþegar í vél Wizz Air sem frá Riga fyrr í kvöld hafa beðið í þrjá tíma út í vél og hafa ekkert fengið að vita um hvenær þeir komast út.

Hætt var að nota landgöngubrýr í Keflavík af öryggisástæðum vegna hvassviðris síðdegis í dag. Sátu farþegar þá fastar úti í vélum því ekki var hægt að koma þeim út. Verulegar tafir hafa orðið á flugi og Icelandair hefur aflýst átta ferðum til Evrópu og Bandaríkjanna í dag og á morgun.

Friðrik Ingi Friðriksson sat enn fastur úti í vél þegar blaðamaður Vísis náði tali af honum nú skömmu eftir klukkan ellefu í kvöld. Hann var að koma með Wizz Air frá Riga í Lettlandi og lenti vélin í Keflavík kl. 20:19. Hann og farþegarnir í vélinni hafa því beðið í rúmar þrjár klukkustundir eftir að komast út.

„Ég hef aldrei lent í svona áður. Það er skrýtið að það skuli ekki vera til búnaður til að ná farþegum út úr flugvél í roki á Íslandi,“ segir Friðrik Ingi við Vísi.

Brýrnar komnar aftur í notkun

Farþegarnir hafi engar upplýsingar fengið. Friðrik Ingi segist ekki vita hvenær þeim verður hleypt út en hann telji að það verði ekki strax. Farþegarnir hafi þó tekið biðinni vel fram að þessu og haldið ró sinni.

„Frekar já,“ svarar Friðrik Ingi og hlær þreytulega spurður að því hvort að honum sé ekki farin að leiðast biðin.

Uppfært 23:50 Guðjón Helgason, upplýsingafulltrúi Isavia, segir að vél Wizz air hafi verið sú eina sem hafi beðið svo lengi úti á flugbraut. Landgöngubrýrnar hafi verið teknar aftur í notkun ná á tólfta tímanum í kvöld. Flugvallarstarfsmenn þurftu að notast við stigabíla seinni partinn til þess að hleypa fólki frá borði og koma vélum af stað.




Fleiri fréttir

Sjá meira


×