Golf

Valdís Þóra: Mjög stolt af spilamennskunni um helgina

Kristinn Páll Teitsson skrifar
Valdís Þóra Jónsdóttir.
Valdís Þóra Jónsdóttir. LET

Valdís Þóra Jónsdóttir, kylfingur úr GL, lauk leik í 3. sæti á Austr­alian Ladies Classic í Bonville á sjö höggum undir pari um helgina en þetta er í annað skiptið á nokkrum mánuðum sem Valdís tekur þriðja sætið á LET-mótaröðinni, þeirri næststerkustu í heiminum.

Jafnaði hún með því besta árangur Íslendings á sterkustu mótaröð Evrópu sem hún náði í Kína í nóvember. Fékk hún 13.356 ástralska dollara fyrir árangurinn sem er rúmlega milljón í íslenskum krónum en með því kemst hún í sjötta sæti á peningalista mótaraðarinnar.

Ólafía Þórunn Kristinsdóttir, GR, lauk leik í 14. sæti á mótinu á pari en síðustu þrír hringir hennar voru frábærir eftir að hafa komið í hús á fyrsta hring á átta höggum yfir pari.

Erfiðar aðstæður

Veðrið í Ástralíu var að stríða mótshöldurum töluvert um helgina en fresta þurfti leik í um fjóra tíma vegna þrumuveðurs á lokahringnum en Valdís var á fjórtándu braut þegar kylfingum var sagt að hætta. Þrátt fyrir það hélt hún áfram að spila vel.

„Heilt yfir er ég mjög ánægð og stolt af spilamennskunni um helgina, sérstaklega þegar við fengum að fara aftur út eftir rigninguna. Þar sá ég að ég var enn þá í þriðja sæti en ég reyndi bara að sækja eins marga fugla og ég gat,“ sagði Valdís í samtali við fréttaritara mótaraðarinnar eftir hringinn.

Valdís er í sjötta sæti á peningalistanum á Evrópumótaröðinni í byrjun árs en á fimmtudaginn hefst fimmta mótið í röð í Ástralíu. „Ég er búin að vera að spila vel, spilamennskan síðustu tvær vikur ýtir undir sjálfstraustið hjá manni og gefur mér mikið fyrir komandi tímabil.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.