Bílar

Chris Harris slapp úr brennandi Alpine A110 í tökum á Top Gear

Finnur Thorlacius skrifar
Alpine A110 bíllinn alelda, en hann var gerónýtur aðeins á 4 mínútum.
Alpine A110 bíllinn alelda, en hann var gerónýtur aðeins á 4 mínútum.

Þeir Chris Harris og Eddie Jordan, þáttastjórnendur Top Gear bílaþáttanna, sluppu betur en á horfðist er þeir óku hinum nýja sportbíl Alpine A110 á mánudaginn síðastliðinn við tökur á nýjum Top Gear þáttum. Á öskömmum tíma varð bíllinn alelda en áður hafði viðvörunarljós kviknað í mælaborði bílsins.

Þegar Chris Harris opnaði hurð bílsins sleiktu eldtungur hendi hans og því lá mikið við að komast sem lengst fjarri brennandi bílnum sem brátt varð alelda og var gerónýtur á aðeins fjórum mínútum. Voru þeir kumpánar staddir á þekktri rallýleið í Mónakó er óhappið varð en þeir sluppu báðir heilir og höldnu frá hildarleiknum.

Chris Harris var ekki skemmt við óhappið og kvaðst sár að sjá svo fallegan og góðan sportbíl fuðra upp, en í leiðinni mærði hann akstursgetu þessa nýja bíls og lýsti fjálglega gleðinni við að aka honum. Ekki liggur ljóst fyrir hvað olli brunanum en allar prófanir á bílnum hafa verið stöðvaðar uns fyrir liggur hvað olli brunanum.

Það gæti því orðið eitthvað í að fleiri Alpine A110 bílar verði seldir á næstunni, en það er sportbílafyrirtækið Alpine sem breytir Renault-Nissan bílum sem stendur að smíði Alpine A110. Þar fer mjög snarpur bíll með 252 hestafla vél sem skilar honum í hundraðið á litlum 4,5 sekúndum, enda bíllinn er fremur smár og léttur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira