Nýársspá Siggu Kling - Ljónið: Ert að fara inn í nýtt upphaf

Elsku Ljónið mitt, eins og þú ert mikið hjarðdýr og þú elskar fólk, þá er sjálfstæði það sem þú átt að hugsa um og er það mikilvægasta sem þú hefur. Ef þú ert ekki dásamlega ánægt með þig þá dregurðu þig í hlé, slekkur á Facebook, dregur þig inn í skel og reynir að vera eins ósýnilegt og þú getur. Samt elskarðu að baða þig í sviðsljósinu en neitar því statt og stöðugt ef þú ert spurt. Þú hefur dásamlegan stíl og hann er mjög persónulegur, en þú tekur álit annarra of nærri þér og getur látið eina neikvæða setningu frá manneskju sem skiptir þig engu máli rífa þig niður í marga daga.

Á þessu ári ertu að fara inn í nýtt upphaf, það færist nær þér með hverjum mánuðinum og sýnir sig sérstaklega þegar þú átt afmæli. Margt gerist að sjálfsögðu sem þér þykir miður en til þess að verði breytingar þarftu að fara nýjan veg og það er ekki alltaf auðvelt en gefur þér dásamlega útkomu. Þú verður upp á þitt besta á þessu ári bæði í útliti og framkomu. Þú sýnir svo sannarlega þínar bestu hliðar þegar haustið gengur í garð og meðal annars geturðu nælt þér í betri vinnu, farið í betri skóla og sannað fyrir vinum þínum og fjölskyldu að þú sért traustsins vert að öllu leyti.

Þú hefur átt það til að loka á vandamálin þín, hreinlega valið að sjá þau ekki, en núna á þessu ári horfir þú svo sannarlega beint í spegilinn og sérð hverju þú þarft að breyta og tekst á við vandamálin í stað þess að setja þau ofan í skúffu og gera ekkert í þeim.

Ég veit að þú ert Ljón, en innst inni ertu bara kettlingur; þú getur látið það sem er að gerast í heiminum trufla þig, en þú færð einhvern veginn mátt til að

slökkva á því sem þú getur ekki breytt því það eina sem þú þarft að hugsa er það sem ÞÚ getur breytt – en þú getur alls ekki breytt heiminum svo láttu ekki heiminn breyta þér.

Þú átt eftir að lenda í svo mörgum ævintýrum, sérstaklega í sumar, að það er algjörlega eins og þú sért statt í Game of Thrones, þarna verðurðu í essinu þínu og fyllir huga þinn nýjum hugmyndum og sérstaklega hugmyndum um hvað veröldin sé nú yndisleg. Þú skalt setja þér það markmið næstu mánuði að veita öðrum tilfinningalegan stuðning og að gefa öðrum hjartahlýju þína, skilning og umburðarlyndi því þá um leið mun nákvæmlega sú orka streyma í gegnum þig.

Þessi dásamlega hvatvísi sem þér er í blóð borin hentar þér ekki eins vel og þú heldur, þú þarft að vera tilbúið að stíga á bremsuna og leggja bílnum til þess að lenda ekki í tilfinningalegu slysi sem þú getur ekki leyst úr. Á þessu ári muntu lifa lífinu til fulls og gera svo mikinn greinarmun á réttu og röngu að bæði þú og aðrir munu hafa óbilandi trú á þessari týpu sem þú ert orðið og gefa þér þau tækifæri sem þú þarft til betri lífsgæða.

Í ástinni gefurðu frá þér mikinn kynþokka eða útgeislun, svo mörg tækifæri eru fyrir þann sem er á lausu, en ef þú átt góðan maka mun hann bara elska þig meira og meira og í því nýturðu þín svo sannarlega.

Fræg Ljón: Cara Delevingne fyrirsæta, Ágústa Eva Erlendsdóttir, leik- og söngkona, Halldóra Geirharðsdóttir leikkona, Birgitta Haukdal söngkona, Barack Obama Bandaríkjaforseti, Ásdís Rán fyrirsæta, Gísli Gíslason geimfari, Geir Ólafsson söngvari, Þórunn Antonía alheimsstjarna, Albert Eiríks, matgæðingur af bestu sort, Jón Óttar Ragnarsson, athafna- og fjölmiðlamaður, Jennifer Lopez söngkona, Diddú, Sirrý Arnardóttir fjölmiðlakona, Arnór Dan, söngvari, Agent Fresco, Ana Mafalda, besta húshjálp í heimi, Sema Erla Serdar, baráttukona, Rósa Ingólfsdóttir, sjónvarpskona, Anton Máni Svansson, kvikmyndaframleiðandi.

Setningin þín er: Láttu þér líða vel, það er valkostur – Láttu þér líða vel (Stjórnin).