Formúla 1

Sebastian Vettel vann í Brasilíu

Kristinn Ásgeir Gylfason skrifar
Sebastian Vettel átti afar góðan dag.
Sebastian Vettel átti afar góðan dag. Vísir/Getty

Sebastian Vettel á Ferrari vann brasilíska kappasturinn í Formúlu 1. Valtteri Bottas á Mercedes varð annar og Kimi Raikkonen á Ferrari var þriðji.

Vettel sigldi auðan sjó megnið af keppninni og hafði Bottas fyrir aftan sig allan tíma. Raikkonen þurfti að glíma aðeins við Hamilton undir lokin. Hamilton ók sem andsetinn og náði ótrúlegum árangri eftir að hafa ræst af þjónustusvæðinu. Hamilton náði þó ekki inn á verðlaunapall.

Ræsingin var spennandi, Vettel náði forystunni af Bottas og Esteban Ocon á Force India og Romain Grosjean á Haas flæktust saman með þeim afleiðingum að Ocon þurfti að hætta keppni, þetta var því í fyrsta skipti sem Ocon fellur úr leik í keppni í Formúlu 1. Hann hafði lokið 27 keppnum í röð.

Kevin Magunssen á Haas féll einnig úr leik á fyrsta hring sem og Stoffel Vandoorne á McLaren. Öryggisbíllinn var kallaður út á meðan brak var hreinsað af brautinni. Öryggisbíllinn kom svo inn við lok fimmta hrings.

Lewis Hamilton var iðinn við kolann að taka fram úr ökumönnum. Hann var orðinn níundi eftir níu hringi. Bretinn hafði ræst af þjónustusvæðinu. Hamilton stakk sér fram úr Fernando Alonso við upphaf 20. hrings og var þá orðinn sjöundi.

Brautin var afar heit í keppninni. Malbikið var um 60°C sem er óvenju hátt. Það virtist hafa talsverð áhrif á dekkjaslit hjá ökumönnum.

Felipe Massa keyrði sína síðustu keppni í Formúlu 1 í Brasilíu. Vísir/Getty

Hamilton var orðinn fimmti á 21. hring og var þá um 17 sekúndum á eftir Vettel sem var fremstur. Hann hóf sókn á Verstappen sem var fjórði.

Bottas var fyrstur af fremstu mönnum til að taka þjónustuhlé á 28. hring Hann skilaði ofur-mjúkum dekkjum og fékk mjúk dekk undir. Vettel kom svo inn á 29. hring og hann fékk sömu meðferð og Bottas. Verstappen fékk sömu meðferð á sama hring og Vettel.

Vettel hélt Bottas fyrir aftan sig en munurinn var nánast enginn þegar Þjóðverjinn kom út á brautina aftur. Bottas var í skottinu á Vettel en það breyttist nokkuð hratt í svipað bil. Hamilton leiddi keppnina um tíma og Vettel annar og var fjórum sekúndum á eftir Hamilton. Hamilton var með forystuna eftir 30 hringi eftir að hann ræsti af þjónustusvæðinu.

Hamilton tók þjónustuhlé á 43. hring og fékk ofur-mjúk dekk undir í stað mjúkra sem hann ræsti af stað á. Hamilton kom inn á þjónustusvæðið í forystunni og kom út í fimmta sæti og 19 sekúndum á eftir Vettel sem tók þá aftur forystuna.

Hamilton hóf stórsókn og var sekúndu á hring fljótari en ökumennirnir fyrir framan hann. Hamilton var kominn í sóknarfæri við Verstappen á síðustu 13 hringjunum. Glíman þeirra á milli varði í þrjár beygjur og þá var Hamilton kominn fram úr á 59. hring. Þá voru ekki nema fimm sekúndur í Raikkonen sem var í síðasta verðlaunasætinu. Hamilton var farinn að geta opnað afturvænginn þegar fimm hringir voru eftir. Baráttan var hörð þeirra á milli síðustu hringina en allt kom fyrir ekki.


Tengdar fréttir

Valtteri Bottas á ráspól í Brasilíu

Valtteri Bottas á Mercedes var fljótastur í dag og ræsir fremstur í brasilíska Formúlu 1 kappaksturinn á morgun. Sebastian Vettel á Ferrari varð annar og Kimi Raikkonen á Ferrari var þriðji.

Bottas: Ég vil frekar ræsa af ráspól en þriðji

Valtteri Bottas náði sínum þriðja ráspól á ferlinum á Mercedes bílnum í dag. Hann nappaði ráspólnum af Sebastian Vettel á Ferrari undir lok tímatökunnar. Hver sagði hvað eftir tímatökuna?



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira