Gömul meiðsli tóku sig upp hjá Mané

Sadio Mané er kominn aftur til Liverpool úr landsliðsverkefni með Senegal eftir að gömul meiðsli aftan í læri tóku sig aftur upp.

Mané og félagar tryggðu sér sæti á HM í Rússlandi með sigri á Suður-Afríku á föstudaginn.

Senegal og Suður-Afríka mætast aftur á morgun en Mané verður ekki með í leiknum sem er þýðingarlaus fyrir bæði lið.

Óvíst er hversu alvarleg meiðsli Manés eru og hvort hann missi af einhverjum leikjum með Liverpool á næstunni.

Mané meiddist aftan í læri í síðasta landsleikjahléi og missti af nokkrum leikjum með Liverpool. Hann sneri aftur á völlinn þegar Rauði herinn vann 1-4 sigur á West Ham um þarsíðustu helgi.