Körfubolti

Danielle með þrefalda tvennu í stórsigri Stjörnunnar

Kristinn Páll Teitsson skrifar
Danielle Victoria Rodriguez átti enn einn stórleikinn með þrefalda tvennu.
Danielle Victoria Rodriguez átti enn einn stórleikinn með þrefalda tvennu. Vísir/Andri Marinó

Danielle Victoria Rodriguez fór gjörsamlega á kostum í sannfærandi 72-55 sigri Stjörnunnar gegn Snæfelli í 5. umferð Dominos-deildar kvenna en hún var með þrefalda tvennu ásamt því að stela fimm boltum í leiknum.

Garðbæingar komu inn í leikinn á góðu skriði og tóku yfir leikinn strax í fyrsta leikhluta í Stykkishólmi. Breyttu þær stöðunni úr 2-6 í 30-10 á seinustu sjö mínútum leikhlutans, ótrúlegur 28-4 kafli.

Sami frábæri varnarleikur var til staðar í öðrum leikhluta, þær héldu heimakonum í níu stigum og bættu um leið við forskot sitt. Tóku þær 29 stiga forskot inn í hálfleikinn, staðan 48-19, Stjörnunni í vil.

Eitthvað virðist Ingi Þór Steinþórsson hafa náð að vekja til baráttuhug hjá sínum konum í hálfleik þar sem þær minnkuðu muninn niður í tuttugu stig á ný fyrir lokaleikhlutann.

Bilið var hinsvegar allt of mikið og var fjórði sigur Stjörnunnar í röð aldrei í hættu í fjórða leikhluta þótt að heimakonum hafi tekist aðeins að laga stöðuna á lokamínútunum.

Daniella var stigahæst hjá gestunum með 31 stig ásamt því að taka 14 fráköst, gefa 12 stoðsendingar og stela boltanum fimm sinnum. Samtals 52 framlagspunktar í leiknum.

Hjá Snæfelli var Kristen Denise McCarthy stigahæst með sautján stig ásamt því að rífa niður átján fráköst en hún hitti aðeins úr sex af átján skotum sínum í leiknum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.