Mourinho: Höfum ekkert að sanna á Anfield

José Mourinho, knattspyrnustjóri Manchester United, segir að liðið hafi ekkert að sanna í stórleiknum gegn Liverpool á laugardaginn.

„Við þurfum ekki að sanna neitt. Við erum með okkar markmið fyrir tímabilið, við vitum hvert við viljum fara og hvernig við ætlum að gera það,“ sagði Mourinho í samtali við Sky Sports.

United og Liverpool gerðu jafntefli í báðum deildarleikjunum á síðasta tímabili. Portúgalinn segir að United sé betur í stakk búið til að vinna Liverpool í ár en í fyrra.

„Við erum með betra lið. Það væri ósanngjarnt að segja að [Romelu] Lukaku og [Nemanja] Matic hafi ekki komið sterkir inn. Við verðum að viðurkenna það og þeir eiga hrós skilið,“ sagði Mourinho. Hann segist njóta þess að stýra liðum á móti Liverpool á Anfield.

„Ég vil spila við bestu liðin á bestu völlunum; völlum með sögu. Ég hef átt góð og slæm augnablik á Anfield,“ sagði Mourinho.

United er í 2. sæti ensku úrvalsdeildarinnar með 19 stig en Liverpool er í því sjöunda með 12 stig.