Innlent

Fengu leyfi til að gefa hryssu nafnið Mósan

Benedikt Bóas skrifar
Hryssan Mósan gengur hér í forustu með öðrum hrossum frá Skeggsstöðum. Hún er þriggja vetra, móálótt að lit.
Hryssan Mósan gengur hér í forustu með öðrum hrossum frá Skeggsstöðum. Hún er þriggja vetra, móálótt að lit. Mynd/Skeggsstaðir

Guðrún Hrafnsdóttir, hrossabóndi á Skeggsstöðum og eigandi hryssunnar Mósunnar, fékk ánægjulegt símtal seint á mánudagskvöld. Þar var henni tjáð að búið væri að fara yfir nafnareglur WorldFeng og að ekki væri meiningin að banna nöfn með greini. Mósan er því komin inn í gagnabankann og gekk Guðrún frá pappírunum í gær.

„Það var hringt í mig og mér tjáð að það ætti að leyfa allt íslenskt, jafnvel þótt það væri með greini. Það á að taka strangt á erlendum nöfnum og sum þurfa að fara í skoðun hjá nefndinni en það á að leyfa nöfn með greini,“ segir Guðrún sem var eðlilega kát og glöð með málalyktir.

Hún segist alveg hafa verið tilbúin að fara með málið lengra og halda uppi vörnum til að geta kallað hryssuna áfram Mósuna. Frétt Fréttablaðsins seint í ágúst vakti mikla athygli, ekki aðeins hér á Íslandi heldur út fyrir landsteinana. Þannig fjallaði BBC meðal annars um málið og útvarpsarmur fjölmiðlarisans CBC frá Kanada tók málið upp á sína arma.

Nafninu Mósan var hafnað með þeim rökum að nöfn með greini brytu í bága við íslenska nafnahefð og að sérnöfn væru nokkurs konar jafngildi orða með greini. Hestanafnanefndin, sem tveir aðilar sitja í, var sett á laggirnar af illri nauðsyn. Nánast allir hestaeigendur nefndu hrossin sín góðum og gildum íslenskum nöfnum en ekki allir. Sumir gáfu íslenskum hrossum klúr nöfn og með ruddalegri merkingu og því var ákveðið að grípa inn í.

„Ég er sátt og bakka bara út úr öllu enda fullnaðarsigur,“ segir Guðrún hress og kát sem fyrr.


Tengdar fréttir

Íslenska ríkið valdalaust gagnvart hestanafnanefnd

Ríkið hefur enga aðkomu að reglum um nafngiftir á íslenskum hestum sem skráðir eru í upprunaættbók íslenska hestsins, WorldFeng. Þetta segir í bréfi sem Guðrún Hrafnsdóttir, hrossabóndi á Skeggsstöðum, hefur fengið frá innanríkisráðuneytinu.

Klúr kláraheiti kölluðu á hestanafnanefndina

Dæmi voru um að íslensk hross fengju nöfn með ruddalegri meiningu eða sem voru jafnvel klúr. Það var af illri nauðsyn sem Nafnanefnd íslenska hestsins var sett á laggirnar til að grípa inn í.

Nefnd um hestanöfn neitar nafni Mósunnar

Bóndi á Skeggsstöðum fær ekki að nefna þriggja vetra merina sína Mósuna en frá febrúar hefur hestanafnanefnd úrslitavald um hvað hross megi heita. Atvinnuvegaráðuneytið skoðar nú á hvaða lagagrunni nefndin starfar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.