Innlent

Þingnefnd ræðir reglur um uppreist æru á sérstökum sumarfundi

Garðar Örn Úlfarsson skrifar
Brynjar Níelsson, formaður stjórnskipunar- og eftirlitsnefndar Alþingis og þingmaður Sjálfstæðisflokks.
Brynjar Níelsson, formaður stjórnskipunar- og eftirlitsnefndar Alþingis og þingmaður Sjálfstæðisflokks. vísir/anton brink

Boðað hefur verið til sérstaks fundar í fyrramálið í stjórnskipunar- og eftirlitsnefnd Alþingis til að ræða reglur um uppreist æru.

Fundurinn er haldin að ósk Svandísar Svavarsdóttur úr Vinstri grænum og er tilefnið umræða í kjölfar þess að Róberti Árna Hreiðarssyni, sem nú heitir Robert Downey, var veitt uppreist æru. Róbert var á sínum tíma dæmdur til fangelsisvistar vegna grófra kynferðisbrota gegn unglingsstúlkum.

„Ég er ekki alveg viss um að þetta heyri undir okkar nefnd en það sem vafðist helst fyrir mér er árstíminn. Ég lít ekki á þennan fund sem nauðsynlegan út af neyðarástandi og ekkert sem gat ekki beðið fram yfir miðjan ágúst en einhverjum fannst mikilvægt að gera þetta strax og þá var ég ekkert að standa í vegi fyrir því,“ segir Brynjar Níelsson, formaður stjórnskipunar- og eftirlitsnefndar.

Sjálfur segist Brynjar ekki hafa kynnt sér reglurnar um uppreist æru. „Menn hafa fengið þetta einhverjum tíma eftir að þeir hafa verið dæmdir. Það er ekkert sjálfgefið að þetta þurfi að vera svona og ég vil gjarna vita hvernig þetta er annars staðar.“

Að sögn Brynjars munu fulltrúar dómsmálaráðuneytisins og Lögmannsfélags Íslands mæta á fundinn til að upplýsa um hvernig staðið hafi verið að slíkum málum hérlendis og í nágrannalöndum okkar sömuleiðis. „Dómsmálaráðherra [Sigríður Á. Andersen] hefur boðað breytingu og við fáum kannski að vita hvaða hugmyndir hún hefur um það,“ nefndarformaðurinn. 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira