Innlent

Fjaðrárgljúfur enn til sölu: Fasteignasali segir marga hafa sýnt jörðinni áhuga

Erna Agnes Sigurgeirsdóttir skrifar
Magnús segir að þeir sem festi kaup á jörðinni muni líklega tengja hana við ferðaþjónustu á Íslandi.
Magnús segir að þeir sem festi kaup á jörðinni muni líklega tengja hana við ferðaþjónustu á Íslandi. Vísir/Vilhelm

Jörðin Heiði í Skaftárhreppi á Suðurlandi var sett á sölu í desember 2016. Hluti eignarinnar er Fjaðrárgljúfur sem er ein mesta náttúruperla landsins.

Magnús Leópoldsson, löggildur fasteignasali hjá Fasteignamiðstöðinni, er einn þeirra sem sér um sölu jarðarinnar. Hann tekur fram, í samtali við Vísi, að jörðin sé ekki seld eins og er. Magnús segir að þeir sem festi kaup á jörðinni muni líklega tengja hana við ferðaþjónustu á Íslandi.

Sjá einnig: Náttúruperlan Fjaðrárgljúfur auglýst til sölu

„Það eru aðilar að skoða þetta. Þessu hefur verið sýndur töluverður áhugi og þetta er í athugun,“ segir Magnús.  Hann nefnir að það taki tíma að selja jörð sem þessa og tæknileg atriði geti hægt á ferlinu. Til að mynda þurfi að fjármagna kaupin en jörð sem þessi kostar gífurlegar fjárhæðir.

„Þetta gengur ekki eins hratt fyrir sig og að selja litla íbúð í Reykjavík. Það eru alls konar ástæður fyrir því að mál tefjast,“ segir Magnús en býst við að jörðin verði seld á þessu ári.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.