Innlent

Fjárhagsáætlun sveltir Háskóla Íslands

Benedikt Bóas skrifar
Stjórn Félags háskólakennara ákvað á fundi sínum þann 10. apríl ályktun um fjármálaáætlun ríkisstjórnarinnar fyrir tímabilið 2018-2022.
Stjórn Félags háskólakennara ákvað á fundi sínum þann 10. apríl ályktun um fjármálaáætlun ríkisstjórnarinnar fyrir tímabilið 2018-2022. vísir/vilhelm

Stjórn Félags háskólakennara lýsir yfir miklum vonbrigðum með fjármálaáætlun ríkisstjórnarinnar tímabilið 2018–2022 þar sem hún viðheldur undirfjármögnun háskólastigsins. Í tilkynningu sem stjórnin sendi frá sér segir að stjórnvöld hafa ítrekað gefið fyrirheit um að fjármögnun háskólastigsins á Íslandi verði í takt við það sem gerist í nágrannalöndum. Með fjármálaáætluninni sé ekki verið að efna þessi fyrirheit.

„Fyrirliggjandi fjármálaáætlun er sérstaklega til þess fallin að grafa undan starfsemi Háskóla Íslands en á síðustu árum hefur skólinn mátt þola umtalsverðan niðurskurð. Ef fjármálaáætlun ríkisstjórnarinnar stendur óbreytt verður ekki möguleiki á auknu framlagi til kennslu og rannsókna, sem hefur mátt þola verulegan niðurskurð síðustu ár,“ segir meðal annars.

Þar er einnig bent á að nái fjármálaáætlunin óbreytt fram að ganga sé hætta á að Háskóli Íslands dragist aftur úr í alþjóðlegum samanburði háskóla, þurfi að minnka námsframboð, fresta nauðsynlegri þróun kennsluhátta og hætta við brýna uppbyggingu innviða rannsókna og nýsköpunar.

Stjórnin skorar á ríkisstjórnina að endurskoða fjárhagsáætlun fyrir 2018-2022 með það í huga að hækka töluvert fjárframlag til háskólastigsins.

„Fjárfesting í menntun er fjárfesting í framtíðinni,“ segir enn fremur í tilkynningunni. 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira