Íslenskt fyrirtæki vildi að 250 milljóna veðmálatap kæmi til skattafrádráttar

Spákaupmennskufyrirtæki fær ekki að gjaldfæra 250 milljóna króna tap sem fyrirtækið segir að hafi komið til vegna veðmála um íþróttaleiki í gegnum veðmálasíðuna betfair.com. Þetta er niðurstaða yfirskattanefndar sem staðfesti niðurstöðu ríkisskattstjóra þessa efnis.

Í kæru fyrirtækisins til yfirskattanefndar kemur fram að fyrir hrun hafi það stundað viðskipti sem fólust í spákaupmennsku með erlenda gjaldmiðla. Slík viðskipti séu í eðli sínu veðmál um þróun gengis út frá ákveðnum forsendum. Eftir hrunið dróst starfsemi þess saman meðal annars vegna gjaldeyrishaftanna. Brá eigandi þá á það ráð að afla tekna með þátttöku í erlendri getraunastarfsemi. Vildi eigandinn meina að veðmálin hefðu verið liður í starfsemi hans og því ætti að vera heimilt að telja tapið inn í reksturinn.

Yfirskattanefnd taldi hins vegar að fyrirsvarsmaður félagsins hefði stofnað veðmálareikninginn í eigin nafni og veðjað á körfubolta og knattspyrnu í eigin nafni. Til þess notaði hann viðskiptakort félagsins.

Þá þótti ekki unnt með nokkru móti að fallast á það að veðmál á íþróttaleiki teldust fjármálagerningar í skilningi laga um verðbréfaviðskipti. Að endingu var bókhaldi félagsins um veðmálastarfsemina ábótavant. Af þeim sökum var ekki fallist á það að veðmálin tengdust félaginu með nokkru móti og niðurstaða ríkisskattstjóra staðfest.