Enski boltinn

Fullyrt að Hart fari til Liverpool

Eiríkur Stefán Ásgeirsson skrifar
Joe Hart hefur spilað í ítölsku deildinni í vetur.
Joe Hart hefur spilað í ítölsku deildinni í vetur. Vísir/Getty

Framtíð enska landsliðsmarkvarðarins Joe Hart virðist í óvissu en ólíklegt er að hann verði áfram í láni hjá Torino á Ítalíu.

Hart var lánaður til Torino síðastliðið haust eftir að Pep Guardiola, nýr stjóri Manchester City, fékk Claudio Bravo til liðsins sem nýjan aðalmarkvörð.

Hart á enn tvö ár eftir af samningi sínum við City en Torino mun ekki hafa efni á því að kaupa leikmanninn, sem er sagður kosta 20 milljónir punda, jafnvirði 2,8 milljarða króna.

Það er enska götublaðið The Sun sem fullyrðir að Liverpool muni í sumar kaupa Joe Hart frá City, þrátt fyrir að Simon Mignolet hafi átt ágæta leiki í marki Liverpool síðustu vikurnar. ESPN svaraði fréttinni og hafði eftir ónefndum heimildum að Liverpool hefði engan áhuga á að fá Hart í sínar raðir.

Hart, sem fagnar 30 ára afmæli sínu í dag, var lánaður til Ítalíu þar sem forráðamenn City voru ekki reiðubúnir að leyfa honum að fara til keppinauta sinna í ensku úrvalsdeildinni. Sú afstaða hefur mildast og er líklegt að City sé nú reiðubúið að sleppa tökunum af Hart.

Hart er í miklu uppáhaldi hjá stuðningsmönnum Torino sem er í níunda sæti ítölsku 1. deildarinnar með 45 stig.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira