Erlent

Deildu um búrkíní í forsetakappræðum í Frakklandi

Birgir Olgeirsson skrifar
Forsetaframbjóðendurnir í sjónvarpssal í kvöld.
Forsetaframbjóðendurnir í sjónvarpssal í kvöld. Vísir/EPA

Forsetaframbjóðendum lenti saman í sjónvarpskappræðum í Frakklandi í kvöld þegar talið barst að sundfatnaði íslamskra kvenna, eða búrkíní.

Marine Le Pen, leiðtogi þjóðfylkingarinnar, sagði Frakkland eiga að vera á móti fjölmenningu en Emmanuel Macron, leiðtogi En Marche hreyfingarinnar, sakaði Le Pen um að reyna að gera múslima að óvinum Frakka.

Á vef fréttastofu breska ríkisútvarpsins BBC er greint frá því að nýjustu kannanir gefi til kynna að að Le Pen muni hafa sigur í fyrstu umferð kosninganna en að Macron eða Francois Fillon, frambjóðandi Repúblikana, muni hafa sigur gegn henni í seinni umferðinni.

Það rataði í hámæli síðasta sumar þegar bæjarstjórar í Frakklandi ákváðu að banna konum að klæðast búrkíníum á baðströndum.  Var bannið byggt á almannahagsmunum í kjölfar hryðjuverkaárása ásamt því að ýmsir embættismenn héldu því fram að búrkíní sé kúgandi fyrir konur.

Var bannið kært af mannréttindahópum en svo fór að æðsti stjórnsýsludómstóll Frakklands afturkallaði þetta búrkínibann.

Í kappræðunum í kvöld sagðist Macron ekki sammála þeirri skoðun Le Pen að búrkíníið ögraði þeirri efahyggju sem væri rík í Frökkum þegar kemur að trúmálum.

Francois Fillon hefur verið sakaður um að hafa í krafti stöðu sinnar útvegað eiginkonu sinni og börnum laun úr opinberum sjóðum fyrir litla sem enga vinnu.

Fillon hefur hafnað þessum ásökunum og sagðist í kvöld ekki ætla að draga framboð sitt til baka vegna málsins. Sagðist hann jafnframt vera fórnarlamb í þessu máli. 
 




Fleiri fréttir

Sjá meira