Körfubolti

Sebrahestarnir úr vesturbænum oft hátíðarmatur í Ljónagryfjunni

Óskar Ófeigur Jónsson skrifar
Pavel Ermolinskij og félögum hefur gengið illa í Ljónagryfjunni á undanförnum misserum.
Pavel Ermolinskij og félögum hefur gengið illa í Ljónagryfjunni á undanförnum misserum. vísir/anton

Njarðvíkingar fá tækifæri til að hitamæla liðið í kvöld þegar liðið fær Íslands- og bikarmeistara KR í heimsókn í Ljónagryfjuna í Njarðvík.

Njarðvíkingar hafa unnið fimm af síðustu sex leikjum sínum í Domino´s deildinni eða jafnmarga deildarsigri og KR-ingar frá og með 13. janúar. Njarðvík hefur unnið bæði Tindastól og Stjörnuna á þessum tíma og getur nú lokað toppliða hringnum með sigri í kvöld.

Leikur Njarðvíkur og KR hefst klukkan 20.00 í kvöld og verður sýndur beint á Stöð 2 Sport. Þetta er lokaleikur 19. umferðarinnar.

Sebrahestarnir úr Vesturbænum hafa oft verið hátíðarmatur í Ljónagryfjunni á síðustu árum því KR-liðið hefur margoft verið þar í vandræðum undanfarin fjögur tímabil. KR-ingar hafa tapað fimm sinnum í Njarðvík á Íslandsmóti (4) eða í bikar (1) í þjálfaratíð Finns Freys Stefánssonar eða oftar en í öllum öðrum húsum fyrir utan DHL-höllina.

KR-liðið hefur samt unnið deildarleiki sína í Ljónagryfjunni undanfarin ár en tapað leikjunum í úrslitakeppni og bikarkeppni í húsinu. Við þetta bætist vandræðalega frammistaða KR-liðsins í fyrri leik liðanna þar sem Njarðvíkingar unnu ellefu stiga sigur í DHL-höllinni og héldu meisturunum í aðeins 61 stigi.

KR-ingar töpuðu óvænt á Akureyri í síðasta útileik sínum en svöruðu því með sannfærandi sigri á ÍR í síðustu umferð. Sigur kemur Vesturbæingum enn nær deildarmeistaratitlinum en heimamenn í Njarðvík eru í mikilli baráttu um að fá að vera með í úrslitakeppninni. Það verður allavega saga til næsta bæjar verði Njarðvíkingar með fullt hús á móti Íslandsmeisturunum í vetur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira