Körfubolti

Enn ein þrenna Westbrook sá um Lakers

Kristinn Páll Teitsson skrifar
Westbrook hefur verið eins manns her á þessu tímabili.
Westbrook hefur verið eins manns her á þessu tímabili. Vísir/Getty

Stórstjarnan Russell Westbrook sem leikur með Oklahoma City Thunder í NBA-deildinni átti enn einn stórleikinn og lauk leiknum með þrefaldri tvennu í 110-93 sigri á Los Angeles Lakers í nótt.

Var þetta 28. skiptið í vetur sem Westbrook er með þrefalda tvennu en hann var nálægt því að ná henni í fyrri hálfleik með 15 stig, 8 stoðsendingar og 8 fráköst.

Lauk Westbrook leiknum með 17 stig, 18 fráköst og 17 stoðsendingar en hann er 13 leikjum frá meti Oscar Robertson yfir flestar þrefaldar tvennur á tímabili þegar Oklahoma á 24 leiki eftir.

Í Toronto unnu heimamenn tíu stiga sigur á Boston Celtics 107-97 og söxuðu með því á Boston og Washington Wizards í baráttu um annað sæti austurdeildarinnar.

Celtis-menn leiddu um tíma með sautján stigum en Toronto átti góðan lokasprett sem innsiglaði sigurinn.

DeMar DeRozan steig upp í fjarveru félaga síns Kyle Lowry úr bakvarðasveit heimamanna og var stigahæstur í liði Toronto með 43 stig.

Serge Ibaka var einnig flottur  í fyrsta leik sínum í treyju Toronto-manna með 15 stig og 7 fráköst eftir vistaskipti frá Orlando Magic á dögunum.

Þá náðu leikmenn Los Angeles Clippers ekki að sækja sigur gegn San Antonio Spurs í Texas þrátt fyrir að leikstjórnandinn Chris Paul kæmi aftur inn í lið Clippers en leiknum lauk með 105-97 sigri heimamanna í San Antonio.

Eftir að hafa ekkert leikið undanfarnar fimm vikur lék Paul 32 mínútur í gær og var með 17 stig, sex fráköst og fimm stoðsendingar. Austin Rivers kom af krafti inn af bekknum þegar Paul hvíldi sig og var með 23 stig í gær.

Leikir gærkvöldsins:
Philadelphia 76ers 120-112 Washington Wizards
Indiana Pacers 102-92 Memphis Grizzlies
Toronto Raptors 107-97 Boston Celtics
Chicago Bulls 128-121 Phoenix Suns( e. framlengingu)
Milwaukee Bucks 95-109 Utah Jazz
Oklahoma City Thunder 110-93 Los Angeles Lakers
Minnesota Timberwolves 97-84 Dallas Mavericks
Atlanta Hawks 90-108 Miami Heat
Denver Nuggets 129-109 Brooklyn Nets
San Antonio Spurs 105-97 Los Angeles Clippers    

Bestu tilþrif næturnar: Þrefalda tvenna Westbrook: Stórleikur DeRozan:
NBA


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira