Körfubolti

Náði í fleiri sóknarfráköst en mótherjarnir

Óskar Ófeigur Jónsson skrifar
Hildur Björg Kjartansdóttir í leik með landsliðinu.
Hildur Björg Kjartansdóttir í leik með landsliðinu. Fréttablaðið/Stefán

Íslenska körfuboltakonan Hildur Björg Kjartansdóttir hefur staðið sig vel með Texas-Rio Grande Valley háskólaliðinu í bandaríska háskólaboltanum í vetur en hún og liðsfélagar hennar eru komnar í undanúrslit WAC-deildarinnar.

Hildur Björg átti mikinn þátt í 60-52 sigri í framlengdum leik á Chicago State í átta liða úrslitunum. Hildur endaði leikinn með 12 stig og 16 fráköst. Hún tók alls 12 sóknar­fráköst í leiknum eða meira en allt lið Chicago State til samans.

Þetta var önnur tvenna Hildar í röð en hún var með 17 stig og 15 fráköst í leiknum á undan. Á tímabilinu er hún með 8,7 stig og 8,6 fráköst að meðaltali og er íslenska landsliðskonan því að toppa á hárréttum tíma.

Hildur endaði tímabilið nefnilega af miklum krafti og var meðal annars valin leikmaður vikunnar í WAC-deildinni í síðustu vikunni fyrir úrslitakeppnina.



Fleiri fréttir

Sjá meira