Enski boltinn

Gylfi enn og aftur á skotskónum | Sjáðu markið

Ingvi Þór Sæmundsson skrifar

Gylfi Þór Sigurðsson skoraði mark Swansea City þegar liðið gerði 1-1 jafntefli við Crystal Palace á heimavelli í ensku úrvalsdeildinni í dag.

Gylfi kom Swansea yfir á 13. mínútu með frábæru skoti beint úr aukaspyrnu sem Wayne Hennessey í marki gestanna réði ekki við.

Markið má sjá í spilaranum hér að ofan.

Þetta var sjöunda mark Gylfa í úrvalsdeildinni í ár en hann er þegar búinn að jafna markaskor sitt frá því á síðasta tímabili.

Fimm af þessum sjö mörkum hafa komið í síðustu sex deildarleikjum Swansea en Gylfi hefur verið sjóðheitur að undanförnu.

Markið hans Gylfa dugði þó ekki til sigurs því Scott Dann jafnaði metin fyrir Crystal Palace á annarri mínútu seinni hálfleiks og þar við sat.

Swansea hefur fengið átta stig út úr síðustu fjórum leikjum sínum en liðið er í 16. sæti deildarinnar með 27 stig. Palace er í því tólfta með 32 stig.




Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira