Sport

Sigur á Frökkum á HM í bandý

Ingvi Þór Sæmundsson skrifar
Íslenska liðið vann góðan sigur á Frökkum.
Íslenska liðið vann góðan sigur á Frökkum. mynd/aðsend

Íslenska landsliðið í bandý bar sigurorð af Frökkum, 7-4, á HM í dag.

Frakkarnir byrjuðu leikinn af krafti og skoruðu fyrsta markið. Íslenska liðið kom sterkt til baka, skoraði tvö mörk og staðan því 2-1 eftir 1. leikhluta.

Frakkarnir byrjuðu aftur af meiri krafti og skoruðu tvö mörk. Íslendingar tóku þá við sér, skoruðu tvö mörk og héldu eins marks forystu út 2. leikhluta.

Í síðasta leikhluta var hart barist en þrjú mörk frá íslenska liðinu reyndust of mikið fyrir Frakkana og íslenska liðið vann því sinn fyrsta landsleik, 7-4.

Að öðrum ólöstuðum var Andreas Stefansson besti leikmaður íslenska liðsins með 4 mörk og 2 stoðsendingar.

Kristian Magnússon skoraði tvö mörk og gaf eina stoðsendingu og Martin Smedlund var með eitt mark. Tryggvi Stefánsson varði 32 skot í íslenska markinu, þar af mörg dauðafæri.

Liðið spilaði feiknavel í dag og börðust allir sem einn af feiknakrafti.

Martin Smedlund, fyrirliði íslenska liðsins, hafði þetta að segja í leikslok: „Við vissum að við gætum unnið þennan leik. Til þess þurftum við að spila frábæran varnarleik og bæta sóknarleikinn miðað við síðustu leiki. Við gerðum það í dag og unnum því algjörlega verðskuldaðan sigur í dag.“

Leik Íslands og Frakklands má sjá í heild sinni með því að smella hér.

Frakkar sækja að íslenska markinu. mynd/aðsend
Martin Smedlund er fyrirliði íslenska liðsins. mynd/aðsend


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira