Sport

Átta prósent Íslendinga vilja á EM

Samúel Karl Ólason skrifar
Íslenskir áhorfendur á Laugardagsvelli í sumar.
Íslenskir áhorfendur á Laugardagsvelli í sumar. Vísir/Ernir

Íslendingar hafa sótt um 26.985 miða á leiki á Evrópumótinu í Frakklandi í sumar. Það samsvarar um 8,15 prósentum Íslendinga. Knattspyrnusamband Evrópu, UEFA, virðist ánægt með áhugann og bendir á að þetta samræmist því að 6,6 milljónir Þjóðverja sæktu um miða.

„Ísland hefur sýnt ástríðu fyrir UEFA EURO 2016 sem á sér ekki hliðstæðu, þar sem aðdáendur hafa sótt um þann fjölda miða í gegnum UEFA.com sem samsvarar rúmlega átta prósentum þjóðarinnar,“ segir á vef UEFA.

Hafa verður þó í huga að líklega hafa ekki átta prósent Íslendinga sótt um miða, heldur hafi margir sótt um miða á fleiri en einn leik og jafnvel alla.

Ísland er fámennasta þjóðin sem mun hafa tekið þátt í lokastigi mótsins og á vef UEFA segir að árangur landsliðsins sé ótrúlegur. Íslendingar séu færri en einn fimmti af Norður-Írum, sem er næst fámennasta þjóð mótsins.

Þá sé 23 manna lið Íslands um 0,007 prósent af þjóðinni, sem samsvari því að í hópi Rússa væru fleiri en tíu þúsund leikmenn.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira