Handbolti

Sigurganga Dags og þýska landsliðsins heldur áfram

Óskar Ófeigur Jónsson skrifar
Dagur Sigurðsson, þjálfari þýska landsliðsins.
Dagur Sigurðsson, þjálfari þýska landsliðsins. Vísir/Getty

Þýska karlalandsliðið í handbolta vann sjö marka sigur á Túnis, 37-30, í vináttulandsleik í Stuttgart í kvöld en þýska liðið er að undirbúa sig fyrir Evrópumótið í Póllandi sem hefst seinna í þessum mánuði.

Dagur Sigurðsson stýrði liðinu til sigurs í sjötta leiknum í röð en framundan eru síðan tveir leikir við Ísland í Þýskalandi um komandi helgi. Það verða síðustu leikir beggja þjóða fyrir EM.

Christian Dissinger, lærisveinn Alfreðs Gíslasonar hjá Kiel, var markahæstur í þýska liðinu með átta mörk en þeir Tobias Reichmann og Steffen Weinhold skoruðu báðir fimm mörk.

Túnisbúar komust þremur mörkum yfir í byrjun leiks, 6-3 og 7-4, en þýska liðið var búið að jafna metin í 7-7 eftir tíu mínútna leik.

Þýsku leikmennirnir voru með frumkvæðið það sem eftir lifði hálfleiksins en komst aldrei meira en tveimur mörkum yfir. Þýskaland var síðan 20-18 yfir í hálfleik þar sem Christian Dissinger var búinn að skora sex mörk fyrir Þjóðverja.

Þýska liðið var síðan mun sterkar í seinni hálfleiknum sem liðið vann 17-12.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira