Körfubolti

Sigrún Sjöfn samdi við Grindavíkurliðið

Óskar Ófeigur Jónsson skrifar
Lórenz Óli Ólason, formaður Kkd. UMFG og Sigrún Sjöfn Ámundadóttir handsala samninginn
Lórenz Óli Ólason, formaður Kkd. UMFG og Sigrún Sjöfn Ámundadóttir handsala samninginn Mynd/Fésbókarsíða Grindavíkur

Landsliðskonan Sigrún Sjöfn Ámundadóttir hefur ákveðið að spila með Grindavík í Domino‘ s deild kvenna í kröfubolta í vetur en Grindvíkingar tilkynntu um þetta á fésbókarsíðu sinni í kvöld.

Þetta er gríðarlegur liðsstyrkir fyrir Grindavíkurliðið sem er nú ekki árennilegt enda hafa margir sterkir leikmenn gengið til liðs við liðið í haust.

Sigrún Sjöfn hefur verið í hópi bestu körfuboltakvenna síðustu ár og fastamaður í íslenska landsliðinu en í fyrravetur lék hún með sænska liðinu Norrköping.

Sigrún var ekki áfram hjá sænska liðinu og hefur í haust spilað með uppeldisfélagi sínu Skallagrími. Sigrún var meðal annars með 31,5 stig að meðaltali í fyrstu tveimur leikjum Borgarnesliðsins í 1. deildinni.

„Það er okkur Grindvíkingum gífurleg ánægja að kynna til leiks Sigrúnu Sjöfn Ámundadóttur. Það vita allir sem fylgjast með körfubolta hér á landi hversu öflug hún er. Þetta teljum við vera loka púslið í kvennalið okkar og stefnan ætti að teljast nokkuð augljós. Við ætlum að gera atlögu að öllum þeim titlum sem í boði eru. Við bjóðum hana velkomna til leiks," segir á fésbókarsíðu Grindavíkur sem og á heimasíðu Grindavíkur.

Sigrún Sjöfn er 27 ára gömul en hún steig sín fyrstu spor með Haukum í efstu deild en hefur einnig spilað með Hamar og KR í efstu deild.  Hún varð tvisvar Íslandsmeistari með Haukum og spilaði einnig til úrslita um titilinn sem leikmaður Hamars og KR.

Grindavík vann stórsigur á Haukum í fyrsta leik sínum í Domino´s deildinni þrátt fyrir að leika án nokkurra lykilmanna og koma Sigrúnar þýðir að Grindavík ætlar sér að berjast um titlana í kvennakörfunni í vetur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.