Innlent

Óupplýst lögreglumál - Morð og andlát ungs manns

Eitt þekktasta óupplýsta morðmál á Íslandi, morðið á Gunnari Tryggvasyni leigubílstjóra í janúar 1968, verður til umfjöllunar í næsta þætti af Óupplýstum lögreglumálum næstkomandi sunnudagskvöld. Sviplegt fráfall tvítugs manns, Benedikts Jónssonar, verður einnig til umfjöllunar í þættinum en Benedikt lést af völdum áverka sem hann hlaut eftir slagsmál fyrir utan skemmtistaðinn Þórscafé í nóvember 1974.

Gunnar Tryggvason leigubílstjóri fannst látinn í leigubíl sínum, 18. janúar 1968 við Laugalæk í Reykjavík. Gunnar hafði verið skotinn í hnakkann en lögreglu gekk erfiðlega að finna ummerki eða vísbendingar sem nýttust við rannsókn málsins.  Sumir hafa líkt morðinu á Gunnari við aftöku, en engin ummerki voru um slagsmál eða átök í leigubílnum.

Það var svo ekki fyrr en rúmu ári síðar að byssa fannst og eftir rannsókn bandarísku alríkislögreglunnar, FBI, og síðar Scotland Yard í Bretlandi, var hægt að staðfesta að umrædd byssa væri morðvopnið. Einn maður sat lengi í gæsluvarðhaldi grunaður um morðið en hann var síðar sýknaður.

Ungur maður lést eftir slagsmál við skemmtistað
Benedikt Jónsson frá Stóru-Ávík á Ströndum fannst meðvitundarlaus fyrir utan skemmtistaðinn Þórscafé 9. nóvember 1974. Lögregla flutti hann á slysadeild en hann lést áður en þangað var komið. Benedikt hafði verið að skemmta sér á Þórscafé ásamt félaga sínum og lent í slagsmálum fyrr um kvöldið. Það voru þó engir áverkar voru á líkama hans og aldrei var upplýst um dánarorsök Benedikts.

Fjórði þáttur Óupplýstra lögreglumála verður sýndur næstkomandi sunnudag kl. 20:30 á Stöð 2. Hægt er að horfa á fyrri þætti á VOD / Stöð 2 Frelsi, í gegnum OZ í iPad og iPhone og Netfrelsi á Stod2.is.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.