Innlent

Eigendur Buy.is og iPhone.is saka hvor annan um meiðyrði

Fanney Birna Jónsdóttir skrifar
Friðjón Björgvin Gunnarsson, eigandi Buy.is og Sigurður Þór Helgason, eigandi iPhone.is, eru allt annað en sáttir hvor við annan.
Friðjón Björgvin Gunnarsson, eigandi Buy.is og Sigurður Þór Helgason, eigandi iPhone.is, eru allt annað en sáttir hvor við annan.

Eigandi Buy.is stefndi eiganda iPhone.is fyrir meiðyrði fyrir að hafa kallað sig óheiðarlegan skattsvikara, vænt hann um kennitöluflakk og að svíkja út vörur og þjónustu án þess að greiða skatta eða gjöld, ásamt öðru. Aðalmeðferð í málinu fer fram fyrir Héraðsdómi Reykjavíkur í dag og má búast við að dómur muni falla innan fjögurra vikna.

Ummælin lét eigandi iPhone.is, Sigurður Þór Helgason, falla á vefsvæðinu Vaktin.is undir spjallþræðinum „Kennitöluflakk“ undir nafninu zobbah, en Friðjón Björgvin Gunnarsson, eigandi Buy.is vill meina að ummælin innihaldi ærumeiðandi aðdróttanir og gerir þá kröfu að ummælin verði dæmd dauð og ómerk og að Sigurður verði dæmdur til að greiða eina milljón í miskabætur. Friðjón vill meina að ummælin séu ósönn og í þeim felist ásakanir um refsiverða og siferðislega ámælisverða háttsemi. 

Sigurður vill meina að ummæli hans séu slitin úr samhengi, hann hafi aflað sér upplýsinga um fyrirtæki tengd Friðjóni og segir hann þrjú fyrirtæki sem tengist rekstri Buy.is með beinum hætti hafa verið tekin til gjaldþrotaskipta þar sem ógreiddur virðisaukaskattur og önnur opinber gjöld hafi verið skilin eftir í félögunum og ný félög stofnuð um rekstur Buy.is.

Hann hafi sett ummælin fram í reiði vegna auglýsingar á Facebooksíðu Buy.is þar sem segir að iPhone.is sé okurbúlla vegna verðmunar á iPhone símum.

Segist Sigurður þannig hafa verið að hefna orði orðs með því að svara grófum áburði í auglýsingunni um álösunarvert og álitsspillandi aferli í rekstri iPhone.is, og vill meina að Friðjón hafi sjálfur gerst sekur um að vega að æru og starfsheiðri Sigurðar, misboðið honum freklega og hafi Sigurður með ummælunum á vefsvæðinu goldið líku líkt.

Þá vill Sigurður meina að ummælin séu sönn, þar sem Friðjón sé í raun „skattsvikari“.

Neytendastofa hefur áður sektað Buy.is fyrir ummælin í Facebook auglýsingunni um iPhone.is.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.