Innlent

Panta sér miða með það í huga að mæta ekki

Þórhildur Þorkelsdóttir skrifar
Franklin Graham flytur boðskap sinn á Íslandi í september.  Fjölmargir mótmæla nú komu hans.
Franklin Graham flytur boðskap sinn á Íslandi í september. Fjölmargir mótmæla nú komu hans.

Fjöldi fólks hefur mótmælt komu Franklin Graham til landsins  með því að panta sér miða á samkomuna Hátíð vonar með það í huga að mæta ekki á hana. Ókeypis er á samkomuna sem verður haldin 28. og 29. september næstkomandi. Fólk getur tryggt sér allt að fjóra miða á hvort kvöldið.

Eins og Vísir greindi frá í dag birti þjóðkirkjan á þriðjudaginn frétt þess efnis að Hátíð vonar yrði haldin hér á landi í lok september. Hátíðin er samstarfsverkefni kristinna samtaka, safnaða, sókna og kirkna, sjálfboðaliða og kristniboðssamtaka Billy Graham. Í tilkynningu Þjóðkirkjunnar kemur jafnframt fram að Franklin Graham, sonur Billy Graham, muni flytja boðaskap vonar á báðum samkomunum, en Graham er þekktur fyrir umdeildar yfirlýsingar sínar um samkynhneigð.

„4 miðar komnir á báða dagana, þau sæti verða skilin eftir auð og ég vona að sem flestir næli sér í miða og skilji þau líka eftir galtóm svo sem fæstir mæti á þessa fáránlegu samkomu,“ skrifar ljósmyndarinn Hörður Sveinsson á Facebooksíðu sína í kvöld. Fjölmargir taka í sama streng.

„Fékk heimild fyrir 4 miðum! Flott samkoma hjá þjóðkirkjunni sem ég ætla svo sannarlega að missa af, segir Heiða Kristín Helgadóttir, framkvæmdastjóri Besta flokksins.

„Þessi tímasetning er náttúrlega alveg stórfurðuleg. Ekki það að fólk væri eitthvað hlynntara þessu á öðrum tímum. En það er ofboðslegt taktleysi að flytja inn einhvern hommahatara. Maður þarf nú ekki annað en slá Graham fjölskyldunni upp í Google til að sjá að þetta er fólk sem maður á ekki að vera að hampa," sagði Heiða Kristín í samtali við Vísi.

Anna Pála Sverrisdóttir, formaður Samtakana 78, lýsti yfir miklum vonbrigðum í garð þjóðkirkjunnar þegar hún tjáði sig um málið í dag. Hún sagðist vera persónulega móðguð sem skattgreiðandi yfir því að það eigi að flytja inn þennan mann sem talaði um hjónabönd samkynhneigðra og tilvist hinsegin fólks sem ógnun við samfélagið.

Á vefsíðu Hátíðar vonar er hægt að lesa sér nánar til um dagskrá samkomunnar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira