Viðskipti innlent

Enn deilt um virði Hörpunnar - dómkvaddir matsmenn komnir í málið

Valur Grettisson skrifar
Harpan á fallegum degi. Er hún sautján milljarða króna virði eða sjö milljón króna virði? þÞað er stóra spurningin.
Harpan á fallegum degi. Er hún sautján milljarða króna virði eða sjö milljón króna virði? þÞað er stóra spurningin.

Héraðsdómur hefur fallist á kröfu rekstrarfélags Hörpu um að hlutlausir matsmenn verði kvaddir til þess að meta verðmæti Hörpunnar. Niðurstaða matsmanna getur skipt sköpum um fasteignagjöld Hörpu sem í dag eru að sliga reksturinn. 

Dómari Héraðsdóms Reykjavíkur úrskurðaði í morgun að dómkvaddir matsmenn skyldu kallaðir til þess að meta virði tónlistar- og ráðstefnuhússins Hörpu.

Stjórn Hörpu hefur stefnt Reykjavíkurborg og Þjóðskrá og var málið þingfest á síðasta ári. Ástæðan er sú að Harpa vill ógilda mat yfirfasteignamatsnefndar frá því í maí á síðasta ári.

Nefndin komst nefnilega að þeirri niðurstöðu að fasteignavirði Hörpu væru 17 milljarðar króna á meðan stjórn Hörpu telur virði hússins nær sjö milljörðum.

Raunveruleg ástæða þess að um þetta er deilt er sú að ef Harpa verður metin á 17 milljarða, þurfa forsvarsmenn hússins að greiða 340 milljónir króna í fasteignagjöld. Sé húsið metið á sjö milljarða, þurfa þeir að greiða umtalsvert lægri upphæð, eða 120 til 160 milljónir króna.

Yfirfasteignamatsnefndin notaðist við sérstaka aðferð við að meta tónlistarhúsið. Stjórn Hörpu var ósammála aðferðinni og vildi því fá dómkvadda matsmenn til þess að meta virði hússins eftir sömu reglum og almennar fasteignir eru metnar.

Lögmenn Þjóðskrár og Reykjavíkurborgar mótmæltu því þar sem þeir töldu matið engu máli skipta, og héldu því fram að ekki væri hægt að meta Hörpu eins og hverja aðra fasteign.

Dómari var þó ósammála þessu, og samþykkti matið. Því verður nokkur bið á áframhaldi málsins þar til matsmenn hafa lokið sínum störfum.



Fleiri fréttir

Sjá meira