Handbolti

Ólafur Stefánsson samdi við lið í Katar

Ólafur Stefánsson mun leika með liði í Katar á nýju ári.
Ólafur Stefánsson mun leika með liði í Katar á nýju ári. Stefán

Ólafur Stefánsson hefur samið við handboltaliðið Lakhwiya Sports Club í Doha í Katar. Hinn 39 ára gamli leikmaður mun fara til Katar í janúar og leika með liðinu út leiktíðina. Frá þessu er greint á vefsíðunni Handball World. Wolfgang Gütschow, umboðsmaður Ólafs, staðfestir þetta í samtali við Handball World.

Lakhwiya eru nýliðar í deildinni en liðið var sett á laggirnar árið 2009, en knattspyrnlið félagsins hefur náð góðum árangri að undanförnu. Félagið er í eigu innanríkisráðherra Katar, Abdullah bin Nasser bin Khalifa Al Thani.

Gütschow segir að samningaviðræðurnar við félagið í Katar hafi verið skemmtilegar og áhugaverðar. „Við höfum það á tilfinningunni að eigendur félagsins ætli sér að setja ný viðmið fyrir handboltann í Katar," segir Gütschow m.a.

Ólafur segir að hann hafi fengið mörg áhugaverð tilboð og fyrirspurnir. Og hann ætlar að halda öllu opnu um framhaldið næsta sumar.

Ólafur hefur komið víða við á ferlinum en hann hefur ekki leikið með neinu félagsliði frá því að keppnistímabilinu lauk í Danmörku s.l vor. Ólafur hefur leikið með eftirtöldum félagsliðum á ferlinum:

1992–1996 Valur
1996–1998 Wüppertal (Þýskaland)
1998–2003 Magdeburg (Þýskaland)
2003–2009 Ciudad Real (Spánn)
2009–2011 Rhein-Neckar Löwen (Þýskaland)
2011–2012 AG København (Danmörk)



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira