Innlent

Spjaldtölvuvæðing þingsins gæti sparað milljónir í prentkostnað

Þorbjörn Þórðarson skrifar

Spara mætti á þriðja tug milljóna króna árlega í prentunar- og pappírskostnað með því að láta alla þingmenn fá spjaldtölvur í stað þess að prenta út þingskjöl. Dæmi eru um slíkt frá þjóðþingum annarra ríkja.

Árlegur pappírs- og prentkostnaður Alþingis nemur um 30 milljónum króna, en um er að ræða kostnað vegna prentunar og ljósritunar lagafrumvarpa, skýrslna og annarra þingskjala. Stjórnarráðið ber um helming þessarar fjárhæðar vegna prentunar stjórnarfrumvarpa.

Þetta vekur upp spurningar um hvort ekki megi ná fram sparnaði í kostnaði með því til dæmis að láta alþingismenn fá spjaldtölvur.

Kostnaðurinn við að láta allan þingheim fá nýjustu gerð af iPad nemur 5,6 milljónum króna. Ef allir varaþingmenn fengu slíka spjaldtölvu einnig yrði heildarkostnaðurinn 11,2 milljónir.

Í maí síðastliðnum voru keyptar 650 iPad spjaldtölvur fyrir alla meðlimi breska þingsins. Þá fengu allir 790 meðlimir á þjóðþingi Indlands sérstaka kennslu í notkun spjaldtölva í fyrra til að draga úr pappírskostnaði.

Spjaldtölvur hafa slegið í gegn meðal þingmanna í Bundestag, neðri deild þýska þjóðþingsins eins og kemur fram í þessari frétt Spiegel.

Hollendingar hafa gengið enn lengra og beinlínis bannað þingmönnum að prenta út, en í október í fyrra skiptu meðlimir efri deildar hollenska þjóðþingsins alfarið út pennum og pappír fyrir iPad og var þeim kennt að nota sérstakt "app" eða smáforrit sem var sérstaklega hannað fyrir þingið.

Helgi Bernódusson, skrifstofustjóri Alþingis, sagði í samtali við fréttastofu að þetta hefði verið kannað og niðurstaðan væri að þetta myndi aldrei koma í staðinn fyrir prentuð skjöl. Þá væri ljóst að hluti þingmanna myndi aldrei nota slík tæki. Því væri innleiðing spjaldtölva í sparnaðarskyni ekki á dagskrá í þinginu á næstunni.




Fleiri fréttir

Sjá meira