Innlent

Olían lekur upp úr Drekasvæðinu

Gervihnattamyndir benda til þess að olía leki af hafsbotni og til yfirborðs á bletti sunnarlega á Drekasvæðinu. Þetta kom fram á ársfundi Orkustofnunar í Reykjavík í dag. Bresk-hollenskt fyrirtæki, sem sérhæfir sig í olíu- og málmleit með gervihnöttum, fann olíulekann nýlega en hann þykir styrkja vísbendingar um að olíu sé að finna á Drekanum. Fyrsti olíuborpallurinn gæti verið kominn þangað þegar á næsta ári.

Hafi einhver efast um að hægt sé að bora eftir olíu á tvöþúsund metra dýpi á Drekasvæðinu, þá er þetta tækið, borpallurinn Barents sem verður tilbúinn í júní, og er helmingi hærri en Hallgrímskirkjuturn. Geir Sjöberg, forstjóri Aker Drilling, segir borpallinn hannaðan til að bora á allt að þrjúþúsund metra hafsdýpi og borinn komist tíuþúsund metra niður í jarðlögin undir botninum.

Um þrjúhundruð starfsmenn munu vinna á pallinum á þrískiptum vöktum þannig að um eitthundrað manns verða um borð hverju sinni tvær vikur í senn. Bornum er stjórnað með stýripinnum og hátæknivædd stjórnstöð sér um að halda borkrónunni kyrri á sama punktinum í ólgandi stórsjó, því þetta er fljótandi borpallur, sérstaklega hannaður fyrir erfiðar aðstæður á norðurslóðum.

Geir Sjöberg segir að til að standast kröfur um að mengun berist ekki út í umhverfið, um öryggi starfsmanna og um skilvirkan og hagkvæman rekstur sé svona nútímaborpallur einmitt rétta tækið. Hver bordagur mun kosta um eitthundrað milljónir króna, hver hola um tíu milljarða, og að jafnaði þarf að bora tíu holur áður svar fæst um olíu.

Daginn sem slíkt tæki mætir á Drekasvæðið skapast tugir starfa í þjónustumiðstöðvum borpallsins á norðausturhorni Íslands. Terje Hagevang hjá Sagex Petrolium telur þó minnst þrjú ár í það. Hann spáir því að leitarborun hefjist kannski árið 2012.

Hafsteinn Ágústsson, olíuverkfræðingur hjá StatoilHydro í Bergen, telur að leitarborun geti hafist fyrr, en það ráðist ekki síst af því hvort borpallar verði á lausu. Hann tekur fram að hann viti ekki hvaða olíufélög taki þátt í leitinni, en þau ráði sjálf yfir pöllum og ef þau telji svæðið eftirsóknarvert geti þau hafið borun á næsta ári.

Fréttastofa Stöðvar 2 mun á morgun fjallar nánar um þjónustuna og störfin sem gætu skapast á Íslandi vegna olíuleitar.








Tengdar fréttir

Spáir því að Íslendingar verði olíuþjóð

Íslendingar eiga eftir að verða olíuþjóð, segir helsti sérfræðingur Noregs í Jan Mayen svæðinu, og líkir því við verðmætustu olíusvæði heims. Nýjustu hljóðbylgjumælingar sem gerðar voru á Drekanum í fyrra lofa góðu og mikill áhugi er meðal olíufélaga að kaupa upplýsingarnar.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.