Fundu bæjarstjóra milli auglýsinga

Enginn þeirra 23 sem sóttu um starf bæjarstjóra Vesturbyggðar hefur að sögn Ingimundar Óðins Sverrissonar, forseta bæjarstjórnar, gert athugasemdir við að þeim var öllum hafnað og Ásthildur Sturludóttir, sem ekki sótti um, ráðin. Ingimundur Óðinn segir sex hafa dregið umsókn sína til baka og að enginn hinna sautján hafi fullkomlega uppfyllt kröfur bæjarstjórnarinnar. Öllum umsóknum hafi því verið hafnað og auglýsa átti starfið að nýju.

„Þá frétti ég að Ásthildur hefði verið ein umsækjenda sem fóru í gegnum ferli hjá Capacent vegna bæjarstjórastarfsins á Ísafirði. Ég ákvað að kanna það og hún hafði mikinn áhuga á að koma hingað svo við kölluðum hana í viðtal. Ákvörðunin var tekin í kjölfarið," útskýrir Ingimundur Óðinn og undir­strikar að Ásthildur hafi ekki komið til tals fyrr en öðrum umsækjendum hafði verið synjað. Hún hafi verið ráðin í samráði við minnihlutann í bæjarstjórn.

„Það skiptir miklu máli að fá góða manneskju í þetta. Við erum með ákveðnar kröfur; við óskum eftir að fólk sé með háskólamenntun og að það sé tilbúið til að dveljast hérna. Ásthildur hefur enga reynslu af bæjarstjórastöðu en hefur menntun í þessu og hefur verið verkefnisstjóri yfir stórum verkefnum og séð um fjárhagsáætlanagerð. Það skiptir líka máli að hún hefur gríðarlega góð tengsl við stjórnmál og þekkir marga," segir forseti bæjarstjórnar. - gar