Forsendur kjarasamninga brostnar

„Ef fram fer sem horfir eru forsendur kjarasamninga brostnar," segir Gunnar Páll Pálsson, formaður Verzlunarmannafélags Reykjavíkur. Verðbólgan eykst enn og samkvæmt tölum sem Hagstofan birti í morgun er 12 mánaða verðbólga komin í 11,8%. Gunnar bendir á að kjarasamningar verði ekki teknir til endurskoðunar fyrr en í febrúar á næsta ári.

„Það er ekki hægt að segja annað en að þetta sé mikið áhyggjuefni," segir Gunnar Páll í samtali við Vísi. Hann segir að engar skýrar lausnir séu á borðum en til þurfi að koma samvinna stjórnvalda, launþega og atvinnurekenda. „Við viljum fyrst og fremst að menn komi saman og lýsi yfir vilja til að vinna í málunum," segir Gunnar Páll.