Fjórir kostir í boði í gjaldmiðilsmálum

Oddný G. Harðardóttir fjármálaráðherra segir ekkert standa í vegi fyrir því að Ísland uppfylli Maastricht-skilyrði evrusamstarfsins á næsta kjörtímabili. Lang farsælast sé fyrir Ísland að stefna að inngöngu í ESB og upptöku evru. Oddný var meðal ræðumanna á Iðnþingi Samtaka iðnaðarins í gær.

Þá sagði Oddný skattkerfisbreytingar að mestu yfirstaðnar á þessu kjörtímabili.

Jón Daníelsson, prófessor við London School of Economics, tók einnig til máls á Iðnþingi en hann ræddi nokkuð um valkosti Íslendinga í gjaldmiðilsmálum. Í erindi sínu ræddi Jón einnig vanda evrusvæðisins sem hann sagði hafa verið óumflýjanlegan í ljósi hönnunar evrusamstarfsins. Líklegast væri þó að samstarfið kæmist í gegnum erfiðleikana þótt ekki væri víst að lausnir evruríkjanna yrðu fullnægjandi.

Jón sagði Íslendinga standa frammi fyrir fjórum kostum í gjaldmiðilsmálum. Í fyrsta lagi að halda gjaldeyrishöftunum í óbreyttri mynd til langs tíma. Í öðru lagi að afnema höftin og halda krónunni. Í þriðja lagi að taka einhliða upp aðra mynt og að síðustu stæði til boða sú langtímalausn að ganga í ESB og taka upp evru. Þó sagði Jón það fráleitan kost að taka einhliða upp annan gjaldmiðil og lagði áherslu á að hægt væri að afnema höftin á skömmum tíma með réttum undirbúningi.
- mþl