Fékk nær tvöfaldan reikning frá þeim sem seldu ekki eignina

„Mér hrís hugur við að hugsa um það hversu margir lenda í svona svínaríi og borga bara brúsann án athugasemda,“ skrifar Eva Skarpaas á bloggsíðu sína um samskipti sín við fasteignasölu Húsaskjól sem var með húseign foreldra hennar í einkasölu um átta mánaða skeið.



Lækkaði reikninginn um 109 þúsund

Foreldrar Evu skiptu um fasteignasölu eftir nokkra mánuði en fengu 227.155 króna reikning frá fasteignasölunni sem ekki náði að selja eignina. Reikningurinn átti hinsvegar eftir að lækka umtalsvert eftir að Eva blandaði sér í málið en lokareikningur hljóðaði upp á 109.185 minna en upphaflega reikningurinn.



Eva birtir tölvupóstsamskipti sín við fasteignasöluna og rekur símtöl sem hún átti við starfsmann hennar. Reikningurinn sem hún var ósátt við 112 þúsund króna auglýsingakostnað. Þegar málið var hinsvegar kannað hafði fasteignasalan aðeins auglýst eignina einu sinni.



Samningurinn skýr um annan kostnað

Í samtali við Vísi segir Eva að annar kostnaður en auglýsingakostnaður hafi verið skýr í einkasölusamningnum. Kveðið var á um þjónustugjald ef samningnum yrði rift auk gjalds fyrir gagnaöflun. Auglýsingakostnaðurinn hafi hinsvegar komið eins og þruma úr heiðskýru lofti.



„Þessi auglýsingakostnaður, það hringdi strax bjöllum,“ segir Eva. „Þetta voru algjörlega tölur út úr korti fyrir mér.“ Hún sendi fasteignasölunni póst fyrir hönd foreldra sinni og fór fram á skýringar.



Úr 112 í 25 þúsund krónur

Litlar skýringar fengust og bar fasteignasalinn því við að hún gæti ekki sent sundurgreindan reikning á þriðja aðila. Niðurstaðan var hinsvegar sú að aðeins ein auglýsing hafi birst og var samþykkt að lækka kostnaðinn úr 112 þúsund krónum niður í 25 þúsund krónur vegna þessa.



Eva segist hafa fengið mikil viðbrögð við greininni sinni og segir að hátt í þrjátíu þúsund heimsóknir hafi verið á síðuna eftir að færslan birtist. Þá segist hún hafa fengið ógrinni af tölvupóstum frá fólki sem hefur lent í sambærilegri stöðu.



Biðst afsökunar á mistökunum

„Þetta er óskaplega leiðinlegt mál og ég bið viðkomandi innilega velvirðingar. Það er rétt að við gerðum mistök í þessu máli,“ segir Ásdís Ósk Valsdóttir, löggiltur fasteignasali og sú sem átti í samskiptum við Evu vegna málsins, í tölvupósti til Vísis vegna málsins. Hún segir að verklagsreglum hafi verið breytt í kjölfar mistakana.



Ásdís segir að mistökin hafi falist í því að auglýsingin vegna fasteignarinnar hafi verið tekin úr birtingu með stuttum fyrirvara þar sem eignin hafði selst. „Þetta eru algjörlega okkar mistök og höfum við í kjölfarið tekið upp nýtt vinnulag til að koma í veg fyrir samskonar mistök í framtíðinni,“ segir hún.